Заңдастырып үлгермеген шетелдік көліктердің жағдайы қалай болмақ
Автомобиль заңдастыруға өтінім қабылдау биыл шілденің басында аяқталады, - деп хабарлайды Alashainasy.kz тілшісі Кolesa.kz-ке сілтеме жасап.
Мерзімін ұзарту жоспарда жоқ.
ҚР ІІМ Әкімшілік полиция қызметінің төрағасы Қайсар Сұлтанбаев көлігін басқа елде тіркеуден шығарып үлгермегендер Қазақстанда 5 жылға дейін уақытша есепке қоя алатынын хабарлады.
Бұл қалай жүзеге асатыны, қандай құжат рәсімдеп, қандай нөмір беретіні және мұндай машина қандай құқықтық статус алатыны әзірше белгісіз. Бірақ Сұлтанбаев елдің заңын ескермей, шетелдік көлік мініп жүрген тұрғындар тиісінше жазаға тартылатынын ескертті.
Шендінің сөзінше осы уақытқа дейін 161 мыңнан аса автомобиль тіркелген, тағы 13 мыңнан көп техника тіркеуді күтіп отыр. Жауапты орган 22 мамырдан бері 7мың «конструкторды» есепке қойды.
Сонымен қатар Қ. Сұлтанбаев 1 шілдеге дейін өтініш беріп үлгергендер кейін де машинасын заңдастыра алатынын айтты.
Шара жаңа басталған кезде Әкімшілік полиция қызметі төрағасының орынбасары И. Лепёха 1 шілде өтісімен «Заңды жүргізуші» рейді өтіп, тіркелмеген машиналар анықталады деп мәлімдеген.
