Бірліктің қазақстандық моделінің мәні зор
Бүгінгі күні қоғамымызда біртұтас татулық пен жалпыұлттық бірліктің қазақстандық моделі деген түсінік қалыптасқан. Тіпті осынау бірегей, өзіндік ұстанымымызға бүгінде талай ел қызығып, халықаралық сарапшылар тәжірибемізбен бөлісуді сұрауда.
Ал Қазақстандағы бір атаның баласындай жұмылған біртұтастықтың сырын Орталық Азия өңіріндегі Этносаралық және конфессияаралық қатынастарды зерттеу орталығы басшысының орынбасары Дастан Көшербаев:"Еліміздегі ұлттар бірлігінің басты сыры қазақ ұлтында дейді. Қазақтардың кең пейілі, дархандығы, бауырмалдығы, қонақжайлығы, қазақи менталитетінде, болмысында" дейді. Маман биылғы жылы қолға алынып жатқан Қазақтану жобасының да негізгі идеясы осы екенін жасырмады. Яғни алдағы уақытта Қазақтану жобасы аясында ел бірлігіне ықпал етіп отырған қазақы менталитет, мінез-құлық, болмыс секілді қазақ халқына тән барлық асыл қасиеттер жете зерттеліп, ашыла түспек.
Еліміз басқа ешқандай мемлекетке ұқсамайтын, өзіндік қалыптасу тарихы бар мемлекет. Ұлы қазақ даласы кезінде тағдырдың тауқіметімен тоғысып, бүгінде біртұтас елге айналып отырған 140-тан астам мемлекеттің құтты ордасы, туған жері. Бүгнінде еліміз көпұлтты мемлекет ретінде барша әлемге танылып отыр. Бұл тіпті еліміздің ата Заңында да анық көрсетілген. ҚР Ата Заңында «Бiз, ортақ тарихи тағдыр бiрiктiрген Қазақстан халқы, байырғы қазақ жерiнде мемлекеттiлiк құра отырып...», - деп басталу негізі де осында жатыр. Осы орайда айта кетер жайт, кезінде Сингапурдың тұңғыш президенті Ли Куан Ю: «Біз – біртұтас ұлт, біртұтас халықпыз. Елімізде әртүрлі ұлттардың және әртүрлі тілдердің болуы – біздің кемшілігіміз емес, артықшылығымыз», - деген ұстанымын ашық жария еткен болатын. Бүгінгі күні біздің еліміздің ұстанымы да осы.
