Жоғалған туристер аман-есен табылды
Өткен жексенбі күні Алматының биік тауларынан бір топ туристер із-түссіз жоғалып кетті. 
Алматы құтқарушылар қызметінің хабарлауынша, олар таудың биік шыңына шығып, белгіленген уақытта төмен қарай түспей қалған.
Туристердің келеңсіз жағдайға тап болғандығы туралы ақпарат құтқару қызметіне қас қарайған кешкі уақытта келіп түседі. Осыдан кейін республикалық құтқару отряды жедел қимылдап, жоғалған адамдарды іздестіруге кіріскен. Сондай-ақ операцияға Алматы құтқару қызметінің қосымша екі тобы жұмылдырылады. Алматы құтқару қызметі баспасөз жетекшісі Иса Сабыровтың сөзіне қарағанда, жексенбі күні бір топ турист Медеуге қарама-қарсы Панорама биігіне шығады. Алайда белгіленген уақытта төрт турист кері қайтпай қалады. Себебі – бұл уақытта тауды қалың тұман басып, туристерге қолайсыз жағдай туады.
Әлихан КӨПЖАНОВ, республикалық құтқару отрядының бастығы:
– Жоғалған туристерді бүгін біздің қызметкерлер тауып алды. Бірақ нақты қайдан, қай уақытта тауып алғандарын білмеймін. Туристерді қазір Алматыға алып келе жатыр. Бәрі олар аман-есен жеткізілгеннен кейін белгілі болады.
