Алматылық тұрғынға Қытай Халық Республикасынан келген халықаралық жөнелтілімнен жалған ақша жасайтын аппарат табылды.
Алматы қалалық кедендік бақылау департаментінің баспасөз хатшысы Ұлпан Құрайысованың мәліметінше, күдікті затты «Жетісу» кеден бекетінің қызметкерлері кеше халықаралық хат-хабарламаларға кедендік тексеру жүргізу кезінде тауыпты. Оңтүстік астана тұрғынына Қытайдан келген сәлемдеменің ішінен Қазақстан Республикасының 100 теңгелік ақшасын жасауға арналған аппаратқа ұқсас металл қондырғы анықталған. Аталған дерек бойынша сәлемдеменің иесіне қатысты шұғыл іздестіру шаралары қабылданып, күдікті қондырғы сараптамадан өткізу үшін еліміздің Ұлттық банкіне жолданды.
Ұлпан Құрайысова, Алматы қалалық кедендік бақылау департаментінің баспасөз хатшысы:
– Ұлттық банк мамандары жүргізген зерттеу нәтижелері хабарламадан табылған қондырғының жалған ақша жасауға арналған ерекше конструкциялы мөртабан екенін көрсетті. Оқиғаның ҚР Қылмыстық кодексінің 24-бабы және 206-бабының 1-тармағына (жалған ақша жасау) сәйкес келуіне байланысты аталған дерек бойынша қылмыстық іс қозғалды. Қазір істі тергеу амалдарымен Алматы қаласы бойынша Экономикалық және сыбайлас жемқорлыққа қарсы күрес департаментінің мамандары айналысып жатыр.