Қазақ қызы Австралияда қаза тапты
Шетелде тағы бір қазақстандық қайтыс болды. Австралияның Брисбен қаласында 22 жастағы студент Сағынай Батырханованың өлі денесі табылды.
ҚР Сыртқы істер министрлігі баспасөз қызметінің хабарлауынша, қазақстандық бойжеткен Гриффит университетінің 1-курсында оқып жатқан. Оның мәйіті қазанның 1-і күні өзі тұрып жатқан пәтерден табылды. Жергілікті полиция Батырханованың кісі қолынан өлгенін анықтап, күдіктіні де ұстады. Қазақстандық студенттің азаматтық күйеуі, Тайланд азаматы бірге тұрып жатқан құрбысын өлтіргенін бірден мойындаған. Ол бұрын да отбасында кикілжің шығарғаны үшін сотталған болып шықты. Қанды оқиғадан екі күннен кейін сот отырысы өтіп, онда күдіктіні желтоқсанның 5-іне дейін қамауда ұстау туралы шешім шығарылды. Сыртқы істер министрлігі мамандарының мәліметінше, Батырханова мен оның азаматтық күйеуінен үш айлық сәбиі қалды. Бөбек қазір австралиялық әлеуметтік қызметкерлердің қолында. Сыртқы істер министрлігі мен Австралияда да жұмыс атқаратын Қазақстанның Сингапурдағы елшілігінің мамандары осы оқиғаға байланысты марқұмның туыстарына қайғырып көңіл айтып, қолдан келгенше барлық қажетті көмекті көрсететінін мәлімдеді. Еліміздің дипломаттары Австралияның Мәскеудегі елшілігіне қазақстандық азаматтардың мүддесі үшін бұл істі толық зерттеуге ықпал етуді өтініп, ауызша нота бағыттады. Қазір Батырханованың денесін елге әкелу мен оның сәбиінің құқықтық мәртебесін анықтау мәселесі талқыланып жатыр.
Асқар Әбдірахманов, ҚР Сыртқы істер министрлігінің ресми өкілі:
– Бұл қылмыс отбасындағы жанжалдың себебінен болғанға ұқсайды. Нақтырақ айтқанда, күдіктіге екі айып тағылғаны белгілі. Біріншісі – кісі өлтіру, екіншісі – тұрмыстық зорлық-зомбылық жасағаны үшін сот органдары шығарған нұсқауды орындамау, яғни ерлі-зайыпты арасында бұған дейін де кикілжің болып тұрған деген сөз. Өкінішке қарай, мұның бәрі пышақтасумен аяқталып отыр.
