Қазанның 4-5-і күндері республиканың оңтүстік, солтүстік және шығыс бөліктерінде қар жауады. «Қазгидромет» кәсіпорнының мамандары бірнеше тәулік бойы күннің қатты суытатынын ескертеді.
Мамандардың болжамына қарағанда, алдағы екі тәулікте Қызылорда және Оңтүстік Қазақстан облыстарында ауа температурасы 0–2 градусқа дейін төмендеп, алғашқы қардың түсуі ықтимал. Сондай-ақ Солтүстік Қазақстан, Ақмола мен Шығыс Қазақстан облыстарында да үсік болып, сынап бағанасы 5 градусқа дейін төмендейді, күн ала бұлттанып, жауын жауады. Нөсердің арты қарға ұласып, желдің жылдамдығы артады. Бірақ келесі аптаның дүйсенбісінен бастап, ауа температурасы біртіндеп жоғарылап, қайтадан 25 градусқа дейінгі ыстық болады деген болжам бар. Мамандардың сөзіне сенсек, қыс мезгілінің алғашқы белгілері қарашаның екінші жартысында ғана біліне бастайды.
Гүлмира Әкішева, «Қазгидромет» РМК-ның жетекші инженер-синоптигі:
– Қызылорда, Алматы және Шығыс Қазақстан облыстарында алдағы тәуліктерде ауа температурасы күрт төмендеп, қар жауады. Солтүстік аймақтарда да ауа райы жауын-шашынды болып, оның арты қарға айналуы ықтимал. Бірақ қазанның 8-інен бастап республиканың басым аумағында ауа температурасы қайта көтеріледі. Келесі аптадан бастап солтүстікте 18-25, ал оңтүстікте 20-25 градус жылылық күтілуде. Қазан мен қараша айлары жылы болғанымен, қаңтарда қатты суық болады. Ал ақпан мен наурыз айлары жылдағыдай ауыспалы температураны сақтайды. Жалпы, биылғы қыс мезгілі тура 2010 мен 2011 жылдардағыдай болады.
Қазанда қар жауады
Последние статьи автора