Президент өз қарсыластарын бірінші раундта "нокаутқа" жіберді - Сәпиев

Астанадағы "Сарыарқа" велотрегінде Жеңімпаздар форумы өтті. Оған қайта сайланған Қазақстан Президенті Нұрсұлтан Назарбаев қатысты, деп хабарлайды «Алаш айнасы» порталы. Форум барысында Н.Назарбаев сөз сөйлеп, дауыс берген барша халыққа өз алғысын білдірді. Осыдан кейін депутаттар, қоғам қайраткерері мен спортшылар өз тілектерін білдірді. Атап айтқанда, Лондон Олимпиадасының жеңімпазы, боксшы Серік Сәпиев Президентті бірінші раундта жеңіске жеткен боксшыға теңеді. "Бүгін - жеңіс күні! Сайлау науқанының рингінде Сіз бірінші раундта-ақ өз қарсыластарыңызды "нокаутқа" жібердіңіз. Біз өз елімізді сүйеміз. Сол себепті мықты әрі табысты Қазақстан үшін дауыс бердік. Бізді жаңа жеңістерге жетелейтін көшбасшы үшін дауыс бердік. Біз Сізге дауыс бердік. Қазақстан, тек қана алға!", - деді С.Сәпиев. Ресми бөлімнен кейін "Сарыарқа" велотрегіне жиналған 8 мыңға жуық халық: "Нұрсұлтан! Қазақстан!", - деп ұрандады. Сосын Президентпен бірге "Атамекен" әнін шырқады. Айта кетейік, Орталық сайлау комиссиясының алдын ала мәліметтеріне сәйкес, биылғы президенттік сайлауда Нұрсұлтан Назарбаев дауыстың 97,7 пайызын жинап, жеңіске жетті.