Көршіге күніңді қаратпасын...

Судың басында отырған соң, суды көңіл күйлеріне қарап жіберетін қырғыз ағайындардың тірлігі жамбылдық шаруаларды әбден-ақ шаршатып біткен.
Екі мемлекет арасындағы келісім бар болса да, көбіне оны ескергісі келмейтін ағайындар құлақтың басын ашса – алақан­дарында, жұмса, жұдырығында ұстап отыр. Бұл әсіресе күн күйіп тұрған, нағыз егістікті суаратын уақта диқандарды діңкелетеді.
Енді алдағы уақытта көршінің қас-қабағына қарап отырмай, бұл мәселені өзіміз шешуге қол жеткізілді. Меркі ауда­ны меншікті өз каналдарын салып ал­ды. 6400 метрге созылған Аспара кана­лы­на үлкен Шу каналынан су құйылады. Жаңа каналдың су өткізу мүмкіншілігі се­кун­дына 7 кубометрді құрап отыр. Соның арқасында 3400 гектар суармалы алқап сумен қамтамасыз етілетін болады. Әсіресе қант қызылшасы, жүгері егілген алқап енді көр­шілердің көңіл күйіне тәуелді бол­майтын болды. Оның құрылысына бюд­жеттен 660 млн теңге бөлінген. Енді алдағы уақытта басқа аудандардағы суармалы егіс­тіктердің мәселесі де осылай оң­тайлы шешілсе деген ша­руа­лардың тілегі бар.