Алматы облысынан блок-бекеттер алынады: Аймақта тағы бірқатар шектеулер жеңілдетілді
Алматы облысының бас санитарлық дәрігері Қайрат Баймұхамбетов аймақтағы карантиндік шараларға өзгерістер енгізу туралы қаулы қабылдады, деп хабарлайды Stan.kz ақпарат агенттігі.
Құжатқа сәйкес, облыс ішінде COVID-19 бойынша қолайсыз аумақтарды қоспағанда, аудандар мен қалалар арасында блок-бекеттер алынады.
Бұл ретте блок-бекеттер мемлекеттік шекарада, басқа өңірлермен шекарада, сондай-ақ Алматы мен Талдықорғанның айналасында жұмыс істеуді жалғастырады.
Бұдан басқа, моншалар, қоғамдық сауналар, спа, массаж орталықтары және тағы басқа, қызмет көрсету саласы нысандары жұмыс істей бастайды.
Мектепке дейінгі ұйымдарда (жасына қарай) кезекші топтар ашылады, қызметкерлер мен балалардың денсаулық жағдайына бақылау (термометрия) және ЖРВИ белгілері бар қызметкерлер мен балаларды шеттету арқылы шағын жинақты білім беру орталықтары, үйірмелер (жазба бойынша) өз жұмысын қайта бастайды.
Өз қызметін техника қауіпсіздігі бойынша жауапты құтқарушыларды даярлау және қайта оқыту, сондай-ақ күзет және басқа да мамандандырылған ұйымдар үшін мамандандырылған оқу орталықтары бастайды.
Ашық ауада көрерменсіз спорттық іс-шаралар мен жаттығулар өткізуге рұқсат етілген. 50 орынға дейінгі ашық стадиондар іске қосылады.
Бұл ретте қоғамдық орындарды, өнеркәсіп аумақтарын, әуежайларды, аула балалар алаңдарын және басқа да объектілерді санитарлық және дезинфекциялық өңдеу жалғастырылады. Барлық объектілерде күшейтілген санитарлық-дезинфекциялық және маска режимі қатаң сақталуы керек.
Аталған қаулы 2020 жылғы 18 мамырда 08.00 бастап күшіне енеді. Құжаттың толық мәтінін мына жерден оқуға болады.
"Бұл қаулының коронавирустық инфекцияны жұқтырудың жаңа жағдайларының тіркелуіне байланысты асқынған эпидемиологиялық жағдай сақталған Талғар, Кеген аудандары мен Талдықорған қаласына қатысы жоқ екенін атап өту қажет",-деп хабарлайды Алматы облысы әкімінің баспасөз қызметі.
