Алаяқтардың алдауына түспеңіз!

Қостанай облыстық проку­ра­тура қызметкерлері берген ақпаратқа сүйенсек, соңғы уақыт­­тары облыс орталығында телефон алаяқтарының қылмыс­тық әрекеті жиілеуде. Про­ку­ра­тура қызметкері Абат Төремұратұлының айтуын­ша, бүгінгі күнге дейін  ұялы байла­ныс­ты пайдалану арқылы төрт алаяқтық жасау фактісі анықталған. Алаяқтар әдетте сенгіш азаматтарға қоңырау шалып, оның туысы полиция қолына түсті деген жалған ақпа­рат тарата отырып, ақша талап етеді. Ал талап етілген қаржы көлемі 2 мың АҚШ долларына дейін жетіпті.
Абат Төремұратұлы, Облыстық прокуратура қызметкері:
– Бір күні алаяқтар зейнеткер әжейге хабарласып, жалған ақпарат беріп, ақша талап еткен. Қатты қорқып кеткен қарт кісі еш ойланбастан қылмыскер­лердің есепшотына бар жиған-терген қаржысын аударыпты. Әдетте қылмыс­керлер осын­дай әлсіз жандарды пайда­ланып, қаржы­ларын жымқырып отыра­ды. Мұндай жағ­дай орын алса, туыста­ры­ңызға неме­се құқық қорғау органда­рына хабарласу қажет.
Қазіргі таңда орын алған әрекеттер бо­йынша қылмыстық істер қозғалып, алаяқ­тарды іздеу жұмыстары жүру үстінде. Облыс­тық Ішкі істер департаментінің баспасөз қыз­меті берген ақпаратқа сәйкес, жуырда қала­дағы полицияның оңтүстік бөліміне, 29 жа­с­тағы әйел азаматы хабар­ласып, телефон алаяқтарынан зардап шеккенін айтқан. Оның айтуынша, ұялы телефонға смс хабарлама келіп, абоненттің компания акциясына қаты­сып, ұялы теле­фон ұтып алуға мүмкіндігі бар екендігі айтылған. Ұтысты алу үшін аталған нөмірге ұялы бірлік карточкаларын жіберу керек екендігі ескерілген. Сыйлыққа қуанған әйел дереу түрде бірлік карточка­ла­рын сатып алып, аталмыш нөмірге жіберіпті. Осыдан кейін алаяқтар әйелге қоңырау ша­лып, або­нент­тің қымбат бағалы автокө­лік ұтып алға­нын айтқан. Темір тұлпардың кілтін алу үшін абонент банктегі есепшотқа тағы да 60 мың теңге аударуы тиіс екен. Қуанған әйел барлық жиған-тергенін алаяқтардың есепшотына ойланбастан аударған. Деген­мен ұтыстың да, жіберілген қаражаттың да иісі сезілмепті. Тергеу бары­сында анықтал­ғандай, алаяқтар қоста­най­лық тұрғынға Павлодар қаласынан хабар­ласқан екен. Бүгінгі таңда аталмыш факт бойынша тергеу амалдары жүргізіп жатыр. Полиция мәлімет­теріне сәйкес, жыл басы­нан бері осындай қылмыстық әрекет­тердің 147 фактісі тіркел­ген болса, оның 130 қылмысының беті ашыл­ды.