2016 жылы әскерилер түгелдей зейнетақымен қамсыздандыру жүйесіне көшеді

Қазақстан Қарулы Күштерінің барлық әскери қызметкері 2016 жылдың қаңтарынан бастап мемлекеттік зейнетақымен толық қамсыздандыру жүйесіне көшіріледі.
Бұл туралы Қорғаныс министрлігінің баспасөз қызметі хабарлайды.
Қазақстан Қарулы Күштерінің барлық әскери қызметкері 2016 жылдың қаңтарынан бастап мемлекеттік зейнетақымен толық қамсыздандыру жүйесіне көшіріледі деп жоспарлануда. Бұл Қазақстанның зейнетақы жүйесін 2030 жылға дейін жаңғырту тұжырымдамасы шеңберінде қарастырылып отыр. Осылайша, жүйе іске қосылғаннан кейін әскери қызметте шекті жасқа жетіп немесе денсаулығына байланысты және ұйым-штат іс-шаралары арқылы зейнеткерлікке шыққан әскери қызметкерлер мемлекет бюджетінен толық көлемде зейнетақы төлемін алатын болады.
Қазіргі таңда 1997 жылы жүргізілген зейнетақы реформасына сәйкес, мемлекет бюджетінен төленетін зейнетақы 1998 жылдың 1 қаңтары күнгі жағдай бойынша 10 жылдан артық уақыт әскери қызметте болғандарға ғана беріледі. Ал әскери қызметте 10 жылдан аз уақыт жұмыс істегендерге мемлекет бюджетінен зейнетақы жартылай көлемде және зейнетақы жинағандағы ақшалай қаражаттың 20 пайызы төленеді." Үкімет қаулысына сәйкес, 2015 жылдың 1 қаңтарынан бастап зейнеткерлікке шыққан әскери қызметкерлердің зейнетақы төлеменің көлемі 9 пайызға көтерілді. Ал еңбек сіңірген жылдар үшін төленетін зейнетақы төлеміне қол жеткізу үшін еңбек тәжірибесінің жалпы көлемі 25 жыл және 12,6 жылдан кем емес уақыт әскери қызметте үздіксіз еңбек ету міндетті", - делінген хабарламада.