Қарағандыда 12 жасар қари жамағатқа имам болып, тарауих намазын өткізіп жүр. Бұл туралы Астанадағы Әзірет Сұлтан мешітінің ресми сайтынан хабарланды.
«Қарағанды облыстық орталық мешітінде Рамазан айы басталғалы бері Құранды әуелетіп орындайтын, жас баланың дауысын естиміз. Үлкен аға-апаларымыздың, жамағаттың өтінішін жерге қалдырмай, Әбду Мәлік күнде Құран хатым қылады. Жас қари бәрін ұйытып Құран оқыған кезде, махаббат пен рақымдылықта қалқып, Рамазан айының хош самалында сырт көзге қиын, бірақ көңілге қонымды мезеттерді бастан өткеріп жатқаны сөзсіз. Бұрындары басқа елдерде ең жас қари деп, балаларды көрсетіп жатқанда таңғалатын едік. Міне, біздің арқа елінде де, ең жас қари маңдайымызға туа бітіпті. Бұл келешек ұрпағымыздың кемел боларының дәлелі шығар» деп жазады «muslim.kz» сайты.
Әбду Мәлік арабша оқуды жеті жасынан бастаған көрінеді. Ол Құранды соңғы үш жылда жаттап алған. Құран оқып отырып, кез келген жерінен әрі қарай жалғастыр десең, ұшқан құстың жылдамдығындай тез іліп әкете қояды.
«Егер суға толы ыдыс болса, бірақ қамыр илейтін ұн болмаса, дастарқанда ешқашан нан болмайды. Иман – су, ал игі іс ұн тәрізді. Әрқайсысы екіншісі болмаса, адамды жұмаққа жетелемейді. Егер дүние мен ақыретке терең сенсек, бірақ осы сенім негізінде игі іс істемесек, не пайда? Керісінше, егер иманымыз болмаса да, жақсылық жасасақ, үзілген өсімдік сабағы егілген жерге ұқсаймыз. Ерте ме, кеш пе, сол көк сабақтар құрғап, солып қалады. Игі амалсыз иман, имансыз игі іс жемісті болмайды. Алла тағала астында арықтар ағып жатқан жұмақ бақтарын, осы екеуді, яғни иман мен игі істі бірге ұстаған адамдарға нәсіп етеді деп қуантады. Әбду Мәліктің істері, үлкенге де кішіге де өнеге болғай», – деп жазады «muslim.kz» сайты.