Шығыс Қазақстан облысында полиция қызметкерлері отбасындағы зорлық-зомбылыққа қарсы арнайы флешмоб өткізді, деп хабарлайды ҚазАқпарат.
Өңір аумағында 21-30 маусым аралығында «Отбасындағы зорлық-зомбылыққа жол жоқ!» акциясы өткізіліп жатыр. Мұндағы мақсат - отбасындағы зорлық-зомбылықтың алдын алу және жолын кесу бойынша қабылданып жатқан шаралар туралы жұртшылыққа хабарлау, ана мен бала қауіпсіздігін қамтамасыз ету, қоғамдағы отбасы рөлін нығайту. Осы орайда жергілікті полиция қызметінің сақшылары студенттермен бірге арнайы флешмоб өткізді.
«Полиция департаменті отбасылық-тұрмыстық қатынастар аясындағы құқық бұзушылық мәселесі бойынша 4 оңалту орталығымен тығыз байланыс орнатқан. Осындай орталыққа жеткізілген жәбірленушілерге психологиялық, әлеуметтік көмек көрсетіледі», - деді ШҚО ПД Жергілікті полиция қызметі басқармасының бастығы Талғат Нұриев.
Осы ретте, құқық қорғау органдарының қызметкерлері азаматтарды зорлық-зомбылық фактілері болған жағдайда дереу полицияға хабарласуға шақырады.