Шөп шегу қатерлі ісікке шалдықтырады

Марихуана шегу аталық ұрық безі қатерлі ісігіне шалдықтырады. Оңтүстік Калифорния университетінің ғалымдары келешегіне бейжай қарамайтын ерлерді есірткі шөпті «қызық үшін» шегуден бас тартуға шақырады.
Америка онкология қоғамының ха­бар­лауынша, ғалымдар ұрық безі қатерлі ісігіне шалдыққан 163 жас ер адамның мәліметтеріне талдау жасаған. Алынған нәтиже жасы мен ұлттық ерекшелігі әлгі адамдардікіне сәйкес келетін 292 сау ер адамның мәліметтері­мен салыстырылды. Зерттеудің қорытындысы марихуанаға әуес ерлердің ұрық безі ісігіне екі есе көп шалдығатынын көрсетті. Дәрігер Викто­рия Кортесистің айтуынша, әзірше есірткі мен ұрық безі аурулары арасында нақты қандай байланыс бары белгісіз. Бірақ қатерлі ісік марихуана құрамындағы белсен­ді ингредиенттің ұрық өндірісіне жауапты жасушалар жүйесіне кері әсе­рінен болуы мүмкін деген болжам бар. Айта кеткен жөн болар, ұрық безі қатерлі ісігі 15 пен 45 жас аралығындағы адам­дар арасында жиі кездесіп отыр.