Аяқасты ашулану жасөспірімдердің басты ауруына айналып барады

Қазіргі әрбір 12-жасөспірімде «ырыққа көнбейтін ашуланшақтық» ауруының белгісі бар. Гарвард медицина мектебінің дәрігерлері мұны 10 148 балаға жүргізілген тексеру нәтижесінде анықтады.
The Telegraph басылымының хабар­лауынша, ғалымдар кәмелетке толмағандардың үштен екісінің аяқ­асты ашу-ызадан төңіре­гін­де­гілерге қауіп төндіретініне көз жеткізді. Қазіргі жасөспірімдер оқыстан қызбаланып, өзін-өзі ұстай алмайтын болған. АҚШ-та 6 миллионға жуық жасөспірім осын­дай ауытқумен ауырады. Бұл – «әлемнің әрбір 12-жеткіншегі ашу­ланшақ» деген қорытынды жасауға негіз. Профессор Рональд Кесслердің айтуынша, бүгінде ғылым тілінде «ырыққа көнбейтін ашуланшақтық» деп аталатын ауруды дұрыс емдеу жүйесі қалыптаспай тұр. Егер ауру бел­гілерін ерте кезден анықтау мәселесіне жеткілікті көңіл бөлінетін болса, оны емдеудің тиімді тәсілін де тәжірибеге енгізуге болар еді.