Ұстаз – ұлы есім (музыка сабағынан мұғалімдер күніне арналған ән кеші)

Шығыс Қазақстан гумантарлық колледжінің
жекелей музыка пәнінің оқытушысы
Тоқатова Гүлдана Жұмақанқызы

Мақсаты: Ұстазды құрметтеуге, сыйлауға үйрету, ұстаз мамандығының қыры мен сырын түсіндіру. Ән айту және сахна мәдениетіне үйрету, әннің сөздерін жаттай білуге баулу.
Көрнекіліктер: Қанатты сөздер, гүлдер, жалауша, шарлар, слайд.

Ұйымдастыру: а) Ән кеші өтетін орынды мерекеге сай дайындау;
б) ән кешінің қонақтарын қарсы алу, арнайы дайындалған гүл шоқтарын тапсыру.

Барысы:
Көрермендер залға кірген кезде «Көңіл толқыны» күйі ойнап тұрады, күй мазмұнына сай №1 слайд көрсетіледі.
Би: «Ақбұлақ», «Аққулар» би тобының орындауында.
1-жүргізуші: «Ұстаз... жаратылысынан өзіне айтылғанның бәрін жете түсінген, көрген, естіген және аңғарған нәрселердің бәрін жадында жақсы сақтайтын, ешнәрсені ұмытпайтын... алғыр да аңғарымпаз ақыл иесі..., мейлінше шешен, өнер-білімге құштар, аса қанағатшыл жаны асқақ және ар-намысын ардақтайтын, жақындарына да, жат адамдарына да әділ..., жұрттың бәріне... жақсылық пен ізгілік көрсетіп... қорқыныш пен жасқану дегенді білмейтін батыл, ержүрек болуы керек»- деп, Әл-Фараби бабамыз айтқандай ұстаз ерекше мамандық. Сондықтан да бүгінгі мерекелеріңізбен құттықтай отырып, ән кешін Сіздерге арнаймыз. Музыка ырғағымен студенттер ортаға шығады. Ұстаз туралы шығарған өлең жолдары оқылады.

2 - жүргізуші:
Білімнің кәусәр бұлағын,
Жүресің құйып санама,
Біз үшін сенсің - мұғалім,
Ұстаз да, ғалым дана да.
ӘН: «Ұстазым» С. А.Шамкенов Ә. Ә.Еспаев, №2 слайд көрсетіледі.

1 - жүргізуші:
Даналықтың ұстаз боп жалғап ісін,
Еңбек еттің балауса арман үшін.
Сен - ертеңгі бәйтерек болашақтың
Бүгінгі күн тер төккен бағбанысың.

Таныдың да мінезін әр баланың,
Ұштай түстің ұл - қыздың арман - әнін.
Шәкіртіңнің болашақ биігінің
Іргетасын алдымен сен қаладың.

Сәулесіне шомылып жүрек нұрдың,
Талай мәрте таңы атты түлек күннің.
Шығарып сап сапарға, сен солардың
Жақсы азамат болғанын тілеп тұрдың.
1 - жүргізуші: «Ұстаз – ұлы есім» көрініс қойылады (7 студенттің қатысуымен жүзеге асады). Мақсаты: сахна және сөз мәдениетіне баулу, ұстаздарға құрмет көрсете білуге үйрету. Әнді дұрыс орындай білуге жетелеу.
2-жүргізуші:
Ақыл, білім көп бердің,
Анамдайсың мектебім
Сенде өсіп көктедім,
Сенсің өмір көктемім.
Екеуі хормен:
Алғыстарым көп менің
Асыл анам – мектебім!
2-жүргізуші:
Сіздерге қандай құрмет көрсетсек артық емес, еңбектеріңіз ерен. Шәкірттеріңіз тек биіктерден көрінсін. Келесі тамаша әнді қабыл алыңыздар.
ӘН: «Ардақты ұстаз » орындалады.