Ұлы ғұламаның түрін жасап алған пысықай парықсыздарға еріп далақтап шауып жүргендер қаншама

Қоғамда лас жолмен танымал болған белгілі тұлғалар да болады. Ондайлармен қатар жүру былай тұрсын, аман-сәлемін алудың өзі жиіркенішті. Себебі, ондай арамзаларда ешқандай құндылық болған емес, болмайды да. Бар болғаны, жасанды сөз бен жалған әрекет, алдамшы тірлігі ғана. Қайсыбірі бақай есеппен әлде біреудің еңбегі мен күш-қуатын пайдаланып атын шығарып жүр. Енді бірі қолында дәулеті мен құзыры барлардың алды-артына шығып, құйыршығын бұлғаңдатып сүйек дәметкен бұралқы ит секілді тыраштанып әлек. Ең қиыны, жұрттың соларға бас-көзсіз табынып, "элита", "зиялы", "ұлттың қаймағы" деп, шатасып төрден орын сайлап, топ ортада сөз беріп шатасатындығы. Албырт жастардың біраз бөлігі Абай айтқандай "көп айтса көнді, жұрт айтса болды" деп еш танып білместен, тереңге бойламастан кез келгеніне еш ойланбастан PR жасай беретіндігі. Бір шығармасын оқымай тұрып-ақ, азғана топтың сөзіне еріп "пәленше - ұлы жазушы", "түгенше - біртуар" немесе "ғасырда тумайтын ұлы бірдеме" деп ойланбастан мадақтай жөнелетін ормауыздар қаптап кетті. Өтірікке имандай сеніп, ұлы ғұламаның түрін жасап алған пысықай парықсыздарға еріп далақтап шауып жүргендер қаншама. Дәл қазіргідей сын сағатта ұлттың қамын ойлаған кімдер бар, олар қоғамда қалай үн қатып жүр? Ісіне қарап, үлгі-өнегесін көріп барып шынайы бағасын беруге тырысайықшы, әр популистің жетегінде кете бермей!

Қуандық Шамахайұлы
Фейсбуктегі парақшасынан