«Жас Ұлан» кубогы тұсауын кесті

Өткен аптада Алматыда футболдан республикалық «Жас Ұлан» кубогы додасы өтіп, онда 12-13 жас аралығындағы жеткіншектер доп тепті. Бұл турнирді Қазақстан Республикасының Білім және ғылым министрлігінің қолдауымен «Жас Ұлан» бірыңғай балалар және жасөспірімдер ұйымы өткізді.
Қазіргі таңда біздің елде футболға қы­зы­ғушылық танытушылар мен айна­лысу­шылар саны артып келеді. Біреу мінберде тұрып қолдау көрсетсе, енді біреу алаңда додаға түсуге асық. Бұлардың барлығы да Қазақстан халқының салауатты өмір сал­тын қалыптастырып, бойларына ұжым­дық рухты сіңірулеріне ықпал етеді.
Ал доп додасында елеулі жетістіктерге жеткісі келгендер алтын уақыттарын жа­сыл алаңда немесе жаттығу залында өткі­зіп, аяқдоп өнеріне балалық шақтан ма­шық­танулары керек.
Сондықтан «Жас Ұлан» кубогының мақ­саты – оқушылар арасында салауатты өмір салты идеясын нығайту, қазақстандық футбол мәдениетін ары қарай дамытуға ықпал ету, Елбасымыз Н.Ә.Назарбаевтың «Қазақстанның әлеуметтік жаңғыртылуы: Жалпыға ортақ еңбек қоғамына қарай 20 қадам» мақаласын насихаттау.
Аталмыш турнирге 13 өңірден, атап айт­қанда, Астана және Алматы қалала­ры­нан, Ақмола, Алматы, Ақтөбе, Атырау, Пав­ло­дар, Маңғыстау, Қызылорда, Қоста­най, Жамбыл, Қарағанды, Батыс Қазақ­стан облыстарынан осы аймақтардың ең үз­дік командалары қатысты. Олардың бәрі де – облыстық (қалалық) іріктеу турнирле­рінің жеңімпаздары.
Жас жеткіншектер турнирі салтанатты түрде ашылып, балалардың естерінде қа­лар­лықтай болып ұйымдастырылды. Әрі Алматы қаласының «Черлидерлер» тобы өнер көрсетіп, теңбіл доп додасына қаты­су­шы балалардың көңіл күйін көтерді.
Ал жасыл алаңдағы қызу доданың қоры­тындысы бойынша Павлодар облы­сының №25 мектебінің құрама командасы турнирдің жеңімпазы әрі «Жас Ұлан» ку­бо­гының иегері атанды. Екінші орынды Аты­рау облысы, үшінші орынды Алматы қала­сының жас футболшылары иеленді.
Жеңімпаздар мен жүлдегерлерге, сон­дай-ақ осы турнирге қатысқан әрбір оқу­шы­ға бағалы сыйлықтар мен сертификат­тар табыс етілді. Әрі «Үздік ойыншы», «Үз­дік қақпашы», «Үздік қорғаушы», «Үздік шабуылшы», «Үздік жартылай қорғаушы» аталымдары бойынша ерекше көзге түс­кен жас футболшылар анықталып, ол­ар­ға кубок, диплом және бағалы сыйлық­тар табысталды.
Бұл турнирге УЕФА-ның жаттықтырушы кадрларын дайындау бағдарламасы жө­ніндегі техникалық директоры Қайрат Адам­беков қатысты.
Нәзира Бөлтірікова, «Жас Ұлан» бірың­ғай балалар және жасөспірімдер ұйымы­ның төрайымы:
– «Жас Ұлан» кубогы биыл бірінші рет сарапқа салынып отыр. Биылғы до­да­ға 13 өңірдің аймақтық іріктеу дода­ла­рында топ жарған ең үздік команда­лары қатысты. Біз енді осы турнирді жыл сайын өткізіп, дәстүрге айналды­ру­ды мақ­сат тұтып отырмыз.