Рыпакованың Олимпиададан кейінгі жетістіктері
Лондон Олимпиадасында ел абыройын асқақтатқан саңлақтарымыз туған елге келіп, қуаныштарын жерлестерімен бөлісіп, солардың ыстық ықыластарының шуағында тербеліп жүргенде жеңіл атлет Ольга Рыпакова Еуропаға аттанып, бір алтын, бір қола еншіледі.
Үш қарғып секіруден Лондон Олимпиадасында алтынмен апталған чемпион қызымыз, яғни Ольга Рыпакова төрт жылда бір өтетін дүбірлі додадан кейін мүлде дем алған жоқ десек те болады. «Гауһар лига» додасының кезекті кезеңдік сындарына қатысу үшін Еуропаға аттанып, өткен аптада екі жүлде еншіледі.
Әуелі 23 тамыз күні Лозаннада өткен «Гауһар лига» додасының 11-кезеңдік сынында топ жарды. Швейцарияда Рыпакова 14,68 метр көрсеткішпен бірінші орынға ие болды. Рыпакова Лозаннада аса жоғары нәтиже көрсетпесе де, бұл көрсеткіш оның кезең жеңімпазы атануына молынан жетті. Тіпті Қазақстан жұлдызы соңғы мүмкіндіктерінде өзінің осы көрсеткішінен асып түсуге тырыспағандай да. Екінші орынды украин Ольга Саладуха иеленсе (14,42 м), үшінші орын ресейлік Татьяна Лебедеваға бұйырды (14,39).
Бұдан соң Бирмингемге барып, 26 тамыз күні «Гауһар лига» додасының 12-кезеңдік сайысында бақ сынады. Үнемі жол үстінде жүрген Ольганың шаршаңқырап қалғаны осы жолы байқалды. Бірінші мүмкіндігінде 14,34 метрге үш қарғып секірген Ольгамыз бұдан кейін осы көрсеткішінен аса алмады. Әйтсе де осы нәтижемен-ақ үшінші орынға ие болды. Украина қызы Ольга Саладуха – 14,40 метр нәтижемен, ал ямайкалық Кимберли Уильямс 14,37 метр көрсеткішпен біздің Ольганың алдын орап кетті.
Ал біздің Ольга Рыпакованы 2012 жылғы «Гауһар лига» додасының жеңімпазы атануымен әлден-ақ құттықтай беруімізге болады. Себебі әйелдер арасындағы үш қарғып секіру үздіктері үшін «Гауһар лига» додасының бір ғана кезеңдік сайысы қалды. Ал Ольга қорытынды есепте 16 ұпаймен өзгелерден қара үзіп кеткен. Екінші орындағы Саладуханың 10 ұпайы бар. Яғни ол 7 қыркүйекте Брюссельде өтетін «Гауһар лига» додасының кезекті кезеңінде топ жарса да, Рыпаковаға жете алмайды (әдетте кезең жеңімпазына төрт ұпай беріледі). Ал үшінші орындағы Кимберли Уильямстың алты-ақ ұпайы бар.
