Жамбыл облысы, Талас ауданының Майтөбе орта мектебінде бүгінде күрделі жөндеу жұмыстары қызу жүріп жатыр. Жол картасы бағдарламасы аясында бұл мектеп назарға алынып, құрылыс жұмыстарына 229 миллион теңге көлемінде қаржы қарастырылған болатын. Талай жыл жөндеу көрмей келген бұл мектептің биыл қолға алынуы майтөбеліктерді, сөз жоқ, қуантты.
Алайда ауыл тұрғындары бекер қуаныпты. Себебі құрылысшылар қазандығы жоқ мектепті пайдалануға бергелі отыр. Жоба жасалғанда қазандық орнату керектігін ешкім ескермеген. «Сонда ауданның атқамінерлері жылу мәселесіне неге жүрдім-бардым қараған» деген сұрақ тууы орынды.
Бүгінде құрылыс жұмыстарымен «Бином» ЖШС айналысуда. Бірақ құрылысшылар тек жобада көрсетілген жұмыстарды ғана атқарады. Бұл орайда құрылысшыларды да кінәлай алмайсыз. Өйткені жобада қазандық жоқ.
1983 жылы пайдалануға берілген бұл білім ошағында алғашында жылу қазандығы болған екен. Кейін жарамсыз болып, істен шығып қалған. Сондықтан бірнеше жылдан бері мұндағы әр сыныпты жылыту үшін шағын пештер орнатуға тура келген. Ал бірақ пешке жағатын отын мәселесі де оңай емес. Бүгінгі күні заманауи үлгімен күрделі жөндеу жұмыстары жүргізіліп жатқанмен, жылу қазандығы ескерусіз қалып отыр. Оған қоса дәретхана, тұрмыстық бөлмелер де назардан тыс қалған. Тіпті естіген елден де ұят. Егер жөндеу жұмыстары жартылай жүргізілетін болса, онда неге «күрделі жөндеу жұмыстары» деп отырмыз? Одан да «жартылай жөндеу жұмыстары» дегеніміз дұрыс шығар? Не десек те, қыс қамын жазда ойлай отырып, шенділердің мектептегі жылу жүйесін ойламағандары түсініксіз.
Ерген Мәдімаров, Берікқара ауылдық округінің әкімі:
– Мектептің күрделі жөндеу жұмысының жобасын «Сапа Тараз» ЖШС жасаған болатын. Өкінішке қарай, қазандық, тұрмыстық бөлме, дәретхана жобаға кірмей қалыпты. Жобаны қабылдап алған аудандық білім бөлімінің қайда қарағаны белгісіз.
Облыс әкімі былтыр бізге келгенде бұл қазандықты көрген болатын. Басшылықтың назарында тұрған бұл мәселе жерде қалмайтын шығар. Өз шешімін тауып қалар деп үміттенеміз.
Маратбек Нұрбаев, «Бином» ЖШС-нің учаске бастығы:
– Неге екенін білмеймін, жоба жасалғанда бұл жағы ескерілмепті. Әйтсе де алда уақытымыз бар. Жағдайды түзеуге болады. Оған біздің мүмкіндігіміз бар. Тек қосымша келісімшарт жасалып, қаржы бөлсе болғаны.
Мектептегі қауырт жұмыс тамыз айының аяғында аяқталмақ көрінеді. Құрылысшылар білек сыбанып еңбек етуде. Алайда ауылдағы 340 баланың алдағы қыс мезгілінде бүрсең қағып отыратын аянышты халіне алаңдайтын ағайын табылмай отыр.