Теміржол бойында жүрсең, телефоныңа абай бол
Теміржол бекеттері мен пойыздарда ұрлық-қарлық, оның ішінде ұялы телефон ұрлығы өршіп тұр. ҚР Ішкі істер министрлігінің Көліктегі ішкі істер департаменті мамандары тіркейтін күнделікті криминалдық мәліметтердің әрбір екіншісі телефон ұрлығына қатысты.
Департамент мамандарының мәліметіне қарағанда, ұялы телефон ұрлығы жаз бойы тыйылмай келді. Қазанның алғашқы аптасының өзінде желілік полицияға бұл жөнінде шағымданушылардың қатары тағы көбейіп кетті. Соңғы деректерге тоқталсақ, бірнеше күн бұрын Алматы-1 стансысында 1986 жылғы азаматтың «Нокиа» маркалы екі ұялы телефоны бірдей ұрланған. Полицияға арызданушының айтуынша, кешкі мезгілде белгісіз біреулер оның телефондар салынған барсеткасын жымқырып кетіпті. Ішкі істердің желілік бөлімінің криминалдық полиция қызметкерлері жедел іздестіру шарасы барысында Алматыда тұратын 1978 жылғы жігітті қолға түсірді. Одан ұрланған телефондар табылды. Осындай деректер Оңтүстік Қазақстан, Шығыс Қазақстан, Ақмола облыстарындағы теміржол бекеттерінде көп тіркелген. Мамандардың мәліметінше, вокзалдарда жолаушылардың қалта телефонын ұрлаумен айналысатындардың арасында ер адамдар да, әйел адамдар да кездеседі. Негізінен, олар – еш жерде жұмыс істемейтін азаматтар.
