Салафиттер исламтанушы ғалымға қарсы қитұрқы әрекеттер ұйымдастыруда
Исламтанушы ғалым Қайрат Жолдыбайұлы өзіне қарсы теріс ағым өкілдері қитұрқы әрекеттерін жалғастырып жатқанын мәлімдеді, - деп хабарлайды Qamshy.kz. Ол бұл туралы өзінің әлеуметтік желідегі парақшасында жазып отыр.
«Мен Гүленшімін бе?» деген сұраққа жауап берген ғалым өзіне салафиттер тарапынан жала жабылып жатқанын айтады.
«Салафиттер маған қарсы небір қитұрқы әрекеттерін жасауда. Әсіресе Қазақстан мұсылмандары Діни басқармасында аппарат жетекшісі болған күннен бастап жалған авторлардың атымен маған түрлі жалаларын жауып келеді. Себебі – белгілі. Мен салафиттерге түбегейлі қарсымын. «Дін мен діл» атты екі томдық кітабымда салафиттердің қателіктерін әшкерелеп, ханафи мәзһабы мен мәтуруди ақидасының дұрыстығын, Қожа Ахмед Ясауидің сопылық жолының шариғатқа қайшы емес екендігін дәлелдеуге тырыстым. Бұл оларға ауыр тиді», - дейді ғалым.
Қайрат Жолдыбайұлы адасқан ағым өкілдерінің діни кітапты жоюға әрекеттенгенін де жайып салды.
«Тіпті, Елбасының тікелей қолдауымен ашылған «Ислам және білім» қорының қаржыландыруымен неше рет басылып, тегін таратылған осы кітабымды көрген жерлерінде жоюға тырысқандықтарына да куә болдым», - дейді ол.
Ашуға мінген салафиттер Қайрат Жолдыбайұлынан басқа да ғалымдарға күн көрсетпей жатқан көрінеді.
«Олардың негізсіз қаралау әрекеттері менімен шектеліп отырған жоқ. Бүгінде салафиттермен белсенді күресіп жүрген Ерсін Әміре мен Арман Қуанышбаев, Сансызбай Шоқанов, Ризабек Батталов секілді білікті мамандарды да қаралап, оларды шиит, хабашит жасап жүргендер де осы салафиттер. Мені біресе, Мысырдағы көтерілісті ұйымдастырған Юсуф Қардауидің шәкіріті, мемлекетке қарсы адам десе, енді бірде Нұршы-Гүленші деп айыптады. Ешбір дәлелсіз арнайы тапсырыспен жазылған бұл сүйкемелердің авторларының кім екенін де, қай ауылдан есіп тұрғанын да жақсы білемін. Рас, докторлық диссертациямды жазып жатқан соңғы үш жылда бұлардың мені қаралауы бәсеңсіді. Алайда. кешегі Ақтөбедегі оқиғадан кейін салафиттерді заңмен тыйым салу керек деген ұсыныстарымнан соң бұлардың маған шабуылы қайта басталып кетті», - деп жазады ол.
«Бірақ бұл жолы айтарға ешнәрсе таба алмағаннан кейін бұрынғы жаздырған шимайларын желілерге күмпілдетіп қайта салып жатыр. Ашығын айтайын мен Фетхуллах Гүлен жамағатының Қазақстандағы көсемі де, белсенді мүшесі де емеспін. Бірақ олар жайлы объективті пікірдемін. Құранда: «Қандай бір қауымға (топқа, руға, жамағатқа, ұлтқа) деген дұшпандықтарың сендерді оларға қарсы әділетсіздікке итермелемесін» делінеді. Исламды балақ пен сақалдың деңгейіне түсіріп, дінді сыртқы пішінмен ғана шектеп, діндарлықты жаттанды шаблондармен сөйлеу деп түсінетін, елдің ішіне іріткі салудан басқа мақтанатын істері жоқ сәләфилер мен Сібірден бастап, Африкаға дейін, жаңылыспасам әлемнің 160 мемлекетінде мыңнан аса мектеп ашып, ағартушылықпен айналысып жатқан Гүлен жамағатын бір деңгейге қоя алмаймын. Гүленнің ақидасы мәтуруди, мәзһабы ханафи екендігі мәлім. Ал оның жамағаты болашақта мемлекетімізге қауіпті ме? Оны мемлекетіміздің құрығы ұзын құзырлы орындары анықтауы тиіс. Менің осындай объективті көзқарасым үшін мені Гүленші дейтіндер де табыла кетер. Кімнің аузына қақпақ боласың?!», - деген Қайрат Жолдыбайұлы өзіне тағылған айыптардың негізсіздігін айтады.
Ал, Ф. Гүленге қатысты дау бейтарап комиссия арқылы қаралуы тиіс деп санайды.
«Кешегі Түркияда болған мемлекеттік төңкеріске ұмтылу әрекеті Гүленмен байланыстырылып жатыр. Ал, Гүлен: «Менің ешқатысым жоқ. Халықаралық деңгейде бейтарап комиссия құрылып, төңкеріс әрекетіне менің қатысымның бар-жоқтығы анықталсын, нәтижесі нендей болса да, мен оған ризамын. Егер менің қатысымның бар екендігі анықталса, бұл жерден мені ешкімнің алып кетуінің қажеті жоқ, өзім билет алып, өз аяғыммен барамын» деген ұсынысын айтты. Гүленнің ұсынысы бойынша халықаралық комиссия құрылып, оның қатысы бар екендігі расымен де дәлелденіп жатса, онда ешкімнің көз жасына қарамастан Қазақстандағы лицейлерін жабу керек. Жастарымызға керемет білім беріп жатқандықтары оларды ақтап ала алмайды. Мемлекетіміздің қауіпсіздігі бірінші орында болуға тиіс!», - дейді Қайрат Жолдыбайұлы.
