Қазанның 4-күні Ақтөбе облысы Қобда ауданының орталығы Қобда ауылында көпфункционалды 150 орындық «Нұрлы болашақ» балабақшасының ашылу салтанаты өтті. Облыс әкімінің «Көркейе бер, туған жер!» акциясының аясында «Алтын қыран» компаниялар тобының қаржысына салынған нысан мемлекет меншігіне беріліп, салтанатқа жиналған ел-жұрт кәсіпкер Исламбек Салжановқа өз алғыстарын білдірді.
Облыс орталығынан жүз шақырым шалғайда орналасқан Қобда ауылының бұл қуанышына Архимед Мұхамбетов бастаған облыс атқамінерлері мен Астанадан ат арылтып жеткен Парламент Мәжілісінің депутаты, Халық Қаһарманы Бақытжан Ертаев, сенаторлар Елеусін Сағындықов пен Серік Нөгербеков, Президент Әкімшілігінің өкілі Қалдыбек Байымбетов, «Егемен Қазақстан» республикалық газеті» АҚ президенті Сауытбек Әбдірахманов пен Central Asia Monitor газетінің бас редакторы Бигелді Ғабдуллин мырзалар қатысты. Жергілікті халықтың қуанышын еселеп, ауылдың ажары мен базарына айналған ғимараттың сырты қандай әдемі болса, іші де сондай сұлулық пен жылулыққа толы екенін ауыл адамдарынан бұрын қадірменді қонақтар бірінші тілге тиек етті. Мысалы, осы облысты бірнеше жыл басқарған Елеусін Сағындықов мырза өз сөзінде компьютерлік техникамен жабдықталған мұндай балабақшаның ауыл түгіл, қалада да сирек кездесетінін айтып, өз таңданысын жасырмаса, генерал Бақытжан Ертаев ағамыз: «Ол мұндай балабақшаны Ақтөбеге, иә болмаса Астанаға салса да болар еді. Жоқ, ол елін ойлады, болашақты ойлады, елдің батасын, тілегін ойлап, осында салып отыр. Исламбек осы ауылда туып-өсті. Осы елден шықты. Алақандай еліне жақсылық жасап жатыр енді. Елдің тілегін орындап жатыр. Ал елдің тілегін орындаудан артық іс жоқ», – деп көргенді толғандыратын, естігенді ойландыратын аталы сөз айтты. Елдің ризалығын алу, расында да, оңай шаруа емес. Бірақ «Алтын қыран» компаниялар тобы бір жыл ішінде тұрғызған, жалпы құны 450 миллион теңгеге жетеқабыл «Нұрлы болашақ» балабақшасының елді риза қылатындай бірнеше ерекшелігі бар екені де рас. Оның біріншісі аталмыш нысанның кірпішінен бастап, есік-терезесіне дейінгі барлық құрал-жабдықтары Батыс Еуропа, Ресей және Украина елдерінен алынғандығы болса, екінші ерекшелігі – мұндағы әрлеу жұмыстарының барлығын еуропалық мамандар халықаралық стандартқа сай етіп жүргізген. Бұл балабақшаны өзгелерден озық қып тұрған және бір ерекшелігі – оның материалдық базасы. Балабақша меңгерушісі Жұмазия Ертілеуованың айтуынша, балабақша жаңа инновациялық технологиямен қамтамасыз етілген. Екі ересектер тобы мен музыка залында интерактивті тақта бар. Балабақша тұтас Wi-Fi жүйесіне қосылған. I-PAD және E-BLOCKS бағдарламаларымен жұмыс істейтін балалар сан мен әріптерді қазақ, орыс, ағылшын тілдерінде айтып-жазуға үйренсе, рухани-патриоттық сана-сезімді тәрбиелеу мақсатында сатып алынған «Даналық әліппесі» жобасы халықтық туындыларды балаларға электрондық дыбыстау арқылы жеткізбек. Әлбетте, балабақшаның барлық ерекшеліктерін шағын мақалада айтып тауысу мүмкін емес. Тек бізді қуантқан тағы бір жайт, кәсіпкер азамат «салып бердім, болды» принципін ұстанбай, балабақшаға алынатын қызметкерлер мен тәрбиешілердің барлығын арнайы конкурс арқылы қабылдап, оларды Ақтөбе мен Астана қалаларында арнайы даярлықтан өткізгендігі. Балабақша меңгерушісіне үй сатып әперіп, оны жаңа көлікпен қамтамасыз еткендігі.
«Мен бүгін қатты толқып тұрмын. Көптен бері туған жерге қандай сыйлық жасаған дұрыс болады деген ойда жүр едім. «Көркейе бер, туған жер» акциясы менің ойымды іске асыруға жетелеген бастама болды. Әртүрлі жобалар туралы ойландым. Бірақ ең дұрысы балабақша салу деген тоқтамға келгенімде, менің бұл идеямды қобдалықтардың тілегі де нықтай түсті. Бала – біздің жарқын болашағымыз. Сондықтан балаларға дұрыс тәрбие бере білу, уақыт талабына жауап беретін білімді сіңіру – біздің басты міндетіміз. Ауыл балаларының игілігі үшін жаңа балабақша салып, оны мемлекеттік орган меншігіне тегін тапсыру менің туған өлкем алдындағы азаматтық парызым болатын. Оны орындап, өзімді иығымнан жүк түскендей жеңіл сезініп тұрмын», – деп журналистерге сұхбат берген Исламбек Салжановты ұлтжанды азамат демеске амалың жоқ. Былтыр Моңғолиядағы қазақ мектебінің күрделі жөндеу жұмысына қол ұшын берген арда азаматтың қазақтың қай баласына да бірдей қарайтындығын өмір өзі көрсетіп отыр. Биыл 20 жылдығын тойлап отырған «Алтын қыран» компаниялар тобының туған ел мен туған жерге деген қамқорлығы, әлбетте, мұнымен тоқтап қалмасы анық. Тек осындай сауабы мол, шарапаты зор ұлағатты шаруалар өзге кәсіпкерлерге де үлгі болып, елім-жерім дейтін өзге азаматтарға да жұғысты болса деген тілек біздікі. Әйтпесе Елбасымыз айтпақшы, біздің өңірлердегі мыңдаған нысан қаржы салуды қажет етеді. Біз қазір соңғы жылдары кәсіпкерлеріміз қанша мешіт, шағын шіркеулер мен ғибадатханалар салғанын санап бере аламыз. Алайда, мәселен, өз есебінен ауылдық мәдениет үйлерінің құрылысын немесе жөндеу жұмысын жүргізу, жаңа өлкетану мұражайын, жастарға арналған аула клубтары немесе спорттық алаңдар салу – мейлінше сирек болатын жағдай. Біз осындай қызметті ынталандыруға тиіспіз.