Ақтаудағы стоматологиядағы жанжал: Баланың анасы өз нұсқасын айтты
Ақтауда тіс дәрігері Төлеген Мұхамбетовтің әрекетінен зардап шеккен жеті жасар баланың анасы болған жағдайға қатысты өз нұсқасын айтты, деп хабарлайды Stan.kz ақпарат агенттігі "Лада" сайтына сілтеме жасап.
Қызғалдақ Сапарова 1 қарашада төрт баласымен облыстық стоматологиялық орталыққа келген. Екі баласы тістерінің ауырғанын айтқан екен. Дәрігер балаларды кезексіз қабылдапты. Өйткені оның алдында әйел баласының бірі мүгедек екенін ескертіп қойған.
"Мен баламды тісін емдеуге алдын-ала дайындағанмын. Қызым жыламады, оның тісін тез алып тастады. Ал ұлым қорықты. Екі сағаттай ұлымды дәрігерге аузын ашуға көндіре алмадым. Үш рет кіргенімде де солай болды. Соңғы рет дәрігер агрессивті түрде мені шығарып жіберді. Ұлымды қалдырған соң оны көндіретін шығар деп ойладым. Баламның айғайлаған дауысын да естідім. Кейіннен ұлым шыққан кезде ол маған дәрігердің оны ұрғанын бірден айтты", - дейді баланың анасы.
Сапарованың айтуынша, ол кабинетте орнатылған бейнебақылуды бірден қараған.
"Видеоны көргенде шошыдым. Баламды құрал-жабдықтарымен қорқытып тастаған. Сол күйінше тісін емдете алмай қалдық. Өйткені ол одан да қатты қорқып қалған. Бұл нәрсені жылы жауып қоймаймын, - дейді келіншек.
Айта кетсек, стомотолог-дәрігердің кішкентай балаға қатыгездік танытқаны туралы видео әлеуметтік желіде тарап кеткен болатын.
