Әлеуметтік такси – жаңа қоғамдық көлік
Шымкенттік мүгедек жандар енді тегін такси қызметін пайдалана алады. Мұндай әлеуметтік қызмет түрі Қазақстанның осымен бесінші қаласында енгізіліп отыр.
Шымкент қаласы еңбекпен қамту және әлеуметтік бағдарламалар бөлімі бастығының орынбасары Мария Тоғымбетованың айтуынша, таксидің бұл түрі ең алдымен, өз бетінше жүріп-тұра алмайтын жандарға, атап айтқанда, Ұлы Отан соғысының ардагерлері, І топтағы мүгедектер, сондай-ақ 16 жасқа дейінгі мүгедек балаларға арналған. Шымкентте барлығы 18 мың мүгедек бар, алайда көліктің саны әзірге үшеу. Еңбекпен қамту бөліміндегілер алдағы уақытта олардың саны артады деп сендіреді. «Әсіресе, жүргізушілерді мұқият таңдадық. Олар алдымен тәртіпті, ұқыпты және әлді болуы керек», – дейді бөлім маманы. Әлеуметтік таксиді медициналық және әлеуметтік мекемелерге, құқық қорғау органдарына, мәдени-бұқаралық шараларға баруға ғана пайдалануға болады.
