Мектеп оқушыларына Pfizer вакцинасын салу жалғасуда. Әр емдеу орталығы өзіне қарасты білім ордасының балаларына екпе салып жатыр. Әрине, бәрі де ата-ананың рұқсатымен.
Кезекті вакцинация қаламыздағы Зоя Космодемьянская атындағы №23 мектеп-лицейінде өтті.
Бұл жолы №23 мектеп-лицейінің шәкірттері вакцина салдырды. Екпе қабылдауға білім ордасынан алғашқы болып келгендердің бірі – Анель Уалиханова. Ол өзінің және жақындарының қауіпсіздігі үшін ата-анасының рұқсатымен вакцина салдыруға бел буғандығын айтады.
Анель Уалиханова – З.Космодемьянская атындағы №23 мектеп-лицейінің оқушысы
Мен бүгін өз еркіммен және ата-анамның рұқсатымен екпе қабылдадым. Жағдайым жақсы. Ең бастысы өзімнің және жақындарымның амандығы. Сондықтан, барлық тұрғындарға вакцина салдыруға кеңес беремін.
Мамандар бүгін мектептегі 18 оқушыға вакцина салды. Бәрінің ата-анасы ұл-қызының індетке қарсы екпені қабылдауына келісімін берген. Абай аудандық
санитариялық-эпидемиологиялық бақылау департаментінің мәліметінше, ауданда
жүкті және емізулі әйелдер мен оқушыларды қоса алғанда 33 мың адамға Pfizer вакцинасын салу жоспарланған. Бүгінде олардың 11 пайызы, яғни 3700-ден астам тұрғын екпе қабылдап үлгерген.
Нұркен Сәрсенбаев - Абай аудандық санитариялық-эпидемиологиялық бақылау департаменті басшысының орынбасары
Айтып өтейік, Файзер вакцинасы 12 және 17 жас аралығындағы жасөспірімдерге, сондай-ақ, 16 және 37 аптадағы жүкті әйелдерге салынатын болады. Екпенің бірінші дозасын қабылдаған адам, екіншісін 21-28 күннен соң салдыруы қажет.