Қарағандыда үш айлық баланың жүрегіне күрделі операция жасалды
Қарағанды қаласында үш айлық нәрестенің жүрегіне жасалған күрделі операция сәтті аяқталды, деп хабарлайды «Хабар 24».
Енді сәби кардиология бөлімінде дәрігерлер бақылауында болады.
«Дәл қазір оның денсаулығына төніп тұрған қауіп жоқ», - дейді мамандар.
Нәрестенің ауыр диагнозы дүниеге келгеннен кейін белгілі болған. Яғни, оның жүрегінде 2 сантиметрге жуық тесік болыпты.
Осы сәттен бастап оны операцияға дайындау жұмыстары жүргізілген. Араға аз уақыт салып жүргізілген екі бірдей операциядан кейін кішкентай бүлдіршін өзін жақсы сезіне бастаған.
Ләйлә Зейнуллаева, анасы:
- Басында мазасыз болып жылай беретін, бірақ дәрігер мен медперсонал арқасында үйге оралайық деп жатырмыз. 1 айдан кейін тексереді, сосын 3 ай сайын тексеріліп отырамыз.
Жанат Болатбекұлы, Балалар кардиохирургиясы бөлімінің меңгерушісі:
- Ең бастысы, қазір сәби инфекциялық аурулармен ауырмауы керек. Себебі жүрегіне салмақ түседі. Оны анасына түсіндіріп айттық. Егер бәрі ойдағыдай болса, дені сау бала ретінде қалыптасады.
