Ұлықпан Есілханұлы Сыдықов

Ұлықпан Есілханұлы Сыдықов 1948 жылы 10 қаңтарда Семей облысы Тарбағатай ауданы Шағантоғай ауылында дүниеге келген. 1965 жылы Мақаншы ауданында С.Сейфуллин атындағы орта мектепті алтын медальмен бітірді. 1970 жылы В.И. Ленин атындағы қазақ политехникалық институтын қызыл дипломмен тәмамдаған. Қазақстанның еңбек сіңірген қайраткері, ҚР Ұлттық жаратылыстану ғылымдары академиясының академигі, философия ғылымының докторы, профессор.
1986 жылдан политехникалық институттың есептеу техникасы және автоматика факультетінің деканы, халықаралық байланыстар жөніндегі проректоры. 2001 жылдан Машани атындағы гуманитарлық институттың ректоры, Қазақ ұлттық техникалық университетінің оқу-тәрбие ісі жөніндегі проректоры.
100-ден астам ғылыми жұмыстың, 10 монографияның, философия және саясаттану жөніндегі бірнеше кітаптың авторы. « Дос-Мұқасан» ансамблін құрушылардың бірі. «Той жыры», «Қуанышым», «Бойжеткен», «Әсем жұлдыз» сияқты көптеген әндердің авторы.
«Тың игергені үшін», "Озат еңбегі үшін", "Білім және тәрбие ісінің үздігі" медальдарымен, Қазақ КСР Жоғарғы Кеңесінің құрмет грамотасымен марапатталған. Қорқыт ата атындағы Қызылорда мемлекеттік университетінің «Құрметті профессоры», Үржар ауданының «Құрметті азаматы».