Федор Иванович Щербаков

Федор Иванович Щербаков 1947 жылы 26 мамырда Қарағанды облысы Жаңаарқа ауданы Бидайық ауылында дүниеге келген. Әскери қайраткер, генерал-лейтенант (1993). Ташкент жоғары жалпы әскери командалық училищесін (1970), Мәскеудегі әскери академияны (1980), РФ Қарулы Күштері Бас штабының әскери академиясын (1992) бітірген. 1970 – 1987 жылдары Германиядағы Кеңес әскері тобында, Қиыр Шығыс, Мәскеу әскери округтерінде басшы қызметтер атқарды. 1987 – 1990 жылдары құрама командирі, бірлестік қолбасшысының орынбасары болды. Қазақстан тәуелсіздік алғаннан кейін 40-армия қолбасшысының І орынбасары (1992), 1-армия корпусының командирі (1992 – 1994), Құрлық әскерлерінің қолбасшысы – Қорғаныс министрінің І орынбасары (1994 – 1998), Жалпы қолданыстағы күштердің қолбасшысы (1998 – 2000) қызметтерін атқарды. «Қызыл жұлдыз», «Құрмет» ордендерімен марапатталған.