Бақытжан Тұрсынұлы Жұмағұлов

Бақытжан Тұрсынұлы Жұмағұлов 1953 жылы 18 тамызда Алматы облысында дүниеге келген. Қазақ мемлекеттік университетін, «Әділет» жоғары құқық мектебін тәмамдаған. Техника ғылымының докторы, профессор, Қазақстанның еңбек сіңірген қайраткері, Қазақстан Мемлекеттік сыйлығының лауреаты, Халықаралық инженерлік академияның академигі.
1979-1991 жылдары - Қазақ мемлекеттік университетінің аға инженері, аға оқытушысы, доценті, проректоры. 1991-2001 жылдары - Қазақстан Республикасы Инженерлік академиясы Төралқасының хатшысы, вице-президенті, президенті. 2001-2002 жылдары - Қазақстан Республикасы Білім және ғылым министрінің бірінші вице-министрі. 2002-2005 жылдары - Қазақстан Республикасы Президенті Әкімшілігінің, Премьер-Министр Кеңсесінің бөлім меңгерушісі. 2005-2007 жылдары «Нұр-Отан» халықтық демократиялық партиясының төрағасы, төрағасының бірінші орынбасары. 2007-2008 жылдары Қазақстан Республикасы Парламенті Мәжілісі Төрағасының орынбасары қызметін атқарған. 2008 жылы - Әл-Фараби атындағы Ұазақ Ұлттық университетінің ректоры. 2008 жылы мамырда Б.Т.Жұмағұлов Ислам елдері Инженерлік академиялары федерациясының бьірінші вице-президенті болып сайланды.
2010-2013 жылдары ҚР Білім және ғылым министрі болды.
Ғалымның ғылыми зерттеулерінің негізгі бағыттары мұнай өндіріудің технологиялық процестерін математикалық модельдеу, мұнай кендерін игеруді автоматты талдаудың компьютерлік жүйесін жасау мәселелеріне арналған. Ол сұйықтық пен газ механикасының модельдері үшін жуықтама әдістерінің математикалық проблемаларын зерттеді, мұнай өндіру өнеркәсібі үшін болжау мен талдаудың автоматты жүйелерін жасады. Оның ғылыми зерттеулерінің нәтижелері республиканың бірқатар мұнай өндіруші кәсіпорындарында қолданылып, мұнайлы қабаттардың өнімділігін арттыруға мүмкіндік берді. Жалпы ғалымның 350-ден астам ғылыми еңбегі, оның ішінде 7 монографиясы бар. Оның жетекшілігімен 15-тен астам ғылым кандидаты мен докторы диссертация қорғаған.
«Парасат» орденімен, медальдармен, Қазақ КСР Жоғарғы Кеңесінің Құрмет грамотасымен марапатталған.