Алматы облысында жігітімен бірге қашып кеткен 16 жасар қыз таудан табылды
Алматы облысында 16 жастағы қыз үйден кетіп, содан қайтып оралмады, деп хабарлайды ҚазАқпарат тілшісі.
Алматы облыстық полиция департаменті баспасөз қызметінің мәліметінше, осындай маңызды ақпарат Қапшағай аудандық полиция басқармасына келіп түскен.
Қапшағай қаласының 16 жастағы тұрғыны ата-анасынан сұранып, құрбысының үйіне қонуға кеткен. Ата-анасы қызының жоспарынан мүлдем бейхабар еді. Бойжетіп қалған қызының әрекетінен күмәнданған әкесі тексеруді жөн көреді. Түйсігі алдамағанын және қыздың құрбысының үйіне келмегенін білген әкесі бірден полиция көмегіне жүгінген.
Қыздың мекенжайын анықтауға жедел уәкілдер жұмылдырылды. Тәртіп сақшылары жасөспірімнің жоғалуына негіз болатын барлық нұсқаны пысықтады. Оның ұялы телефоны өшірулі және қыздың достары мен таныстары соңғы күндері қызбен хабарласпаған болып шықты.
Із кесушілердің шұғыл әрі кәсіби шеберлігі нәтижелі болып, бір тәулік ішінде із-түзсіз жоғалған қыз тауда жақын танысының жанынан табылды.
Кәмелет жасына толмаған жасөспірім қыз жігітімен тауға қашып кеткен. Жасөспірімдер өздерінің іске аспай қалған жоспары мен ниеті жайлы тіс жармады. Жасөспірімдермен түсіндіру жұмысы жүргізілді.
