Әйелінің артынан еріп келген қызын зорлаған: Үш баласымен бірге асылып өлген ер адам туралы тың дерек айтылды

Әйелінің артынан еріп келген 15 жастағы өгей қызына зорлық көрсеткен. Бұл туралы журналист Гүлмира Әбіқай өзінің инстаграм парақшасында жазды, - деп хабарлайды Alashainasy.kz тілшісі NEGE.kz-ке сілтеме жасап.

"3 баласын асып өлтіріп, артынан өзіне қол салған еркекке қатысты шындық міне. Ешқандай жоқшылық, қымбатшылық, Үкімет кінәлі емес! Маған жазылған хатты қаз-қалпында жарияладым, артында аңырап қалған жарымен толық сұхбат кешке парақшамда", - деп жазба қалдырды журналист.

Гүлмира Әбіқайға жолданған хатта ер адамға қатысты тың деректер айтылған.

"Ол оқиға ешқандай да саясаттың кесірінен болмаған. Менің туған немере сіңілімнің отбасысы. Күйеуі нашар адам болған. Ішіп алып ұратын. Сіңілімнің еріп келген 15 жастағы қызы бар. Соны зорлап, түрмеге кетпеймін деп өз-өзіне қол жұмсаған. Балаларын қызғанып, сіңілімнен өзімен бірге алып кеткен хайуан. Сіңілімді балаларынан айырып, зарлатып кетті. Үлкен қызының өмірін бұзды", - деп жазылған хатта.

Әзірге бұл ақпарат туралы ресми мәлімет айтылған жоқ.