Алматыда қырып қайта салынып жатқан жолға қатысты ведомство жауап берді
Алматыда көлік жүргізушілері Абай көшесіндегі тасжол қырып алып тасталып, қайта төселіп жатқанына наразылық білдірген еді. Алматы қалалық мобильділік басқармасы осы мәселеге қатысты пікір білдірді, - деп хабарлайды Massaget.kz тілшісі.
Қала тұрғындары бұл жұмыс жаздың аптабында көшедегі жүрісті одан сайын күрделендіргенін, екінші жағынан жаңа асфальтты бүлдіріп қайта төсеу артық шығын екенін жеткізген еді. Сондай-ақ, олардың сөзінше, бұл - бюджет қаржысын желге шашу.
Ал ведомство мәліметінше, тасжол бетінен ақау шыққан.
"Абай даңғылында (Яссауи көшесінің батысында) асфальтбетон жабыны бетінде ақау пайда болды. Сондықтан мердігер ұйымға өз қаражаты есебінен кепілдік міндеттемелері шеңберінде асфальтбетон жабынының ақауын жою тапсырылды", - делінген ведомство жауабында.
Еске салайық, бұған дейін Алматыда 2021 жылы салынған жаңа асфальт қырылып, қайта салынып жатқаны хабарланған еді.
