Сот ақтаулық азаматты әйел зорлады деген айыппен он жылға бас бостандығынан айырған. Жәбірленуші кейіннен өз сөзінен бас тартқан, десек те өз үкім күшінде қалды, деп хабарлайды Stan.kz ақпарат агенттігі Астана арнасына сілтеме жасап.
Сотталған азаматтың анасы келіні полицейлерден қысым көргендіктен, ұлына жаба жапқанын айтады. Сөзінше, екеуінің арасында жанжал туып, арты соттан бір-ақ шыққан.
"Полицейлер: "Ұрғаны үшін оған ешқандай жаза қолданылмайды, одан да зорлады деп арыз жаз" деп айтқан. Алғашында келіспеген, алайда кейіннен полицейлердің алып келген қағазынан қол қойып берген. Артынша бұл ойынан бас тартып, арызын қайтарып алмақшы болғанда, полциейлер келініме де қысым көрсеткен. "Жалған арызың үшін, сені де түрмеге жабамыз" деп айтқан", - дейді айыпталушының анасы.
Ер азамат наурыз айында сотталып кетіпті. Арызданушы шағымын кері қайтарып, тіпті, алғашқы сөздерінен де бас тартқан көрінеді. Дегенмен апелляциялық сот екінші арызды назарға да алмаған.
"Сот іс материалдары мен мән-жайларын зерделеп, әрбір дәйектерді сәйкестілік, сенімділік тұрғысынан және барлық жиналған айғақтарды істі шешуге жеткілікті деп бағалап, сотталушының кінәсін толығымен дәлелдеді" - делінген сот хабарламасында.
Соттың шешімімен келіспеген айыпталушының туыстары Бас прокуратураға шағымданбақ.