Бас прокуратура АҚШ-тың сұрауы бойынша Ресей азаматы Никита Кислициннің Қазақстанда ұсталғаны туралы айтты, - деп хабарлайды Alashainasy.kz тілшісі Tengrinews.kz-ке сілтеме жасап.
БАҚ ресейлік F.A.C.C.T. киберқауіпсіздік компаниясының қызметкері, ресейлік "Хакер" журналының бұрынғы бас редакторы Никита Кислициннің АҚШ-тың сұрауы бойынша экстрадициялық қамауға алу негіздерін зерттеу үшін Қазақстанда ұсталғанын хабарлады. Сонымен қатар, Кислицинді Мәскеу соты компьютерлік ақпаратқа заңсыз қолжеткізгені үшін сырттай қамауға алған.
Отырыс кулуарында Бас прокурордың орынбасары Ұлан Байжанов Никита Кислициннің ұсталғанын растады.
"Бұл өткен күні болды. Иә, америкалық юрисдикциядан сұраным болды. Менің ойымша, ол бағдарламашы немесе ақпарат саласында жұмыс істейді", - деді ол.
Бас прокурордың орынбасары сұраныстың қалай орындалып жатқанын түсіндірді.
"Интерпол арқылы, мәліметтер базасы арқылы қызыл жалауша ілінеді. Ол ұсталды. Қазір біз сұрау салған елге: "Оны не үшін айыптап жатыр? Осы істің фабуласын нақты көрсетуін" сұраймыз. Содан кейін бұл құқық бұзушылық біздің елімізде қылмыс болып табыла ма, жоқ па, соны талдаймыз. Бұл іс жан-жақты зерттеледі. Сонда ғана біз экстрадициялау немесе экстрадицияламау туралы істі қабылдаймыз", - деді ол.
Оның айтуынша, істі зерделеу мерзімі әртүрлі жағдайларға байланысты болады, ал егер ұсталған адам саяси баспана сұраса, процесс сәл кешіктіріледі.
Ұлан Байжанов Ресей тарапының Кислицинді тұтқындау туралы өтінішіне де түсініктеме берді.
"Егер Мәскеу оны кез келген жолмен қайтарғысы келсе, онда олар да ол не жасағанын дәлелдеуі керек. Егер ол Ресей азаматы болса және ол қайтып оралғысы келсе, біз кешенді шешім қабылдаймыз. Мен қандай шешімге келетінімізді әлі айта алмаймын", - деп түйіндеді ол.