"Құпиясы көп, сыры ашылмаған қаза". Алаштанушы ғалым Мұхтар Әуезовтың өлімі туралы айтты
Жас алаштанушы, ғалым Елдос Тоқтарбайұлы қазақтың көрнекті жазушысы Мұхтар Әуезовтің өлімі жайлы біраз деректер келтірді, - деп хабарлайды Alashainasy.kz тілшісі Сaravan.kz-ке сілтеме жасап.
Осыдан тура 61 жыл бұрын (1961, 26 маусым) Алаштың аман қалған үш жұрнағының бірі, үлкен жазушы, ірі суреткер Мұхтар аға Әуезов Мәскеудегі Кремль ауруханасында ота жасатты.
Әуезовтің эпистолярлық мұрасын жіті оқып, мұқият қарасаңыз, көп нәрсені аңғарасыз. Сыры жасырылған ойдың жұмбағын шешу керек… Мұхтар аға Кремль ауруханасынан соңғы күндерінде бірнеше хат жазған. Жазушы Тахауи Ахтанов, Зейін Шашкин мен Есмағамбет Ысмайылов, академик Зейнолла Қабдоловқа, ұлы Мұратқа, жазушы Кәмел Оразалинге… әрқайсысын оқу керек! Қайта оқу керек! Сонда ғана дегдар Мұхтар Омарханұлының жанын, ойын түсінерміз…
Сейсенбі (27 маусым) күні аяулы Мұхтар аға Әуезов жансақтау бөлімінен жанын сақтап шыға алмады… сол күні ғұмыр-жапырағы үзіліп, ғұмыр-сағаты тоқтады. Кім үзді? Кім тоқтатты? Неге?
Оның болмашы бір отадан аман-есен шығамын деген үміті мен сенімін оқыдым. Жанын түсіндім…
Араға үш салып, дәл Мұхтар аға жатқан палатада Алаштың екі жарығының бірі — ірі ғалым, академик, ұстаз Қаныш аға Имантайұлы Сәтбаевтың да шырағы сөнді…
Екі ғұламамыз да 64 жасында фәниден бақиға аттанды. Құпиясы көп, сыры ашылмаған қаза! - деп жазды алаштанушы.
Еске салсақ, бүгін заңғар жазушы Мұхтар Әуезовтың қайтыс болған күні.
