Күшілік ханға мемориал орнату мәселесі талқыланды
Кеше Алматы қаласында «Кетбұқа -Төлегетай» халықаралық қоғамдық қорының ұйымдастыруымен ғылыми-тәжірибелік конференция болып өтті. Конференцияда «Күшілік ханның жалпыадамзаттық өркениеттегі орны мен ролі туралы» мәселе талқыланды. Конференцияға қатысқан тарихшы ғалымдар мен археологтар, мүсіншілер мен суретшілер, архитекторлар мен қоғам белсенділері Ежелгі Найман мемлекетінің соңғы ханы Күшіліктің тарихи күрделі тұлға екендігіне, ол туралы шынайы тарихи ақпараттың тым тапшылығына назар аударды. Сондықтан Өскемен қаласында Күшілікке ханға мемориал орнату мәселесін ең алдымен кешеннің тұжырымдамасын (концепциясын) ғылыми негіздеп алып жөнінде келісімге келді.
Конференцияның шешімімен тарихи-ғылыми тұжырымдама дайындайтын топ құрылды. Топтың жетекшісі болып тарих ғылымдарының докторы, профессор, аты әлемге әйгілі археолог Зейнолла Самашев сайланды. Төрағаның орынбасары болып өнертану профессоры, философия ғылымдарының кандидаты Жанарбек Берістен белгіленді. Топтың құрамында тарих ғылымдарының докторы, профессор, есімін әлем білетін археолог Әбдеш Төлеубаев, тарих ғылымдарының кандидаты, профессор Маратбек Ақанов, медицина ғылымдарының докторы, профессор Жақсыбай Бижігітов, мүсінші Көкеев Еркін, мүсінші, ҚР көркемдік академиясының академигі Қазыбек Сатыбалдин, мүсінші Естай Даубаев, мүсінші Болат Құсайынов, суретші Әсет Жақыпбек, инженер-архитектор Руслан Байкежанов бар. Топтың өз ішінде тарихи-археологиялық, ғылыми, сәулетшілік секциялар жұмыс істейтін болады.
Топ 2022 жылдың 1 сәуіріне дейін тұжырымдама жобасын ұсынатын болып келісілді.
Конференцияға қатысушылар мүсінші Қазыбек Сатыбалдын мен Естай Даубаевтың талқылауға ұсынған жобаларын жоғары бағалады.
Ермек Құрманғалитегі
