Жыл қайыру тәсілі

Мен Григориан күнтізбесі бойынша 1961 жылдың 23 ақпанында туылдым. Қазақша жыл қайыру бойынша сиыр жылы туғанмын десем, біреулер тышқан жылы туғансың дейді. Дұрысы қалай?
Ләззат БАЙКЕНОВА, Арқалық қаласы

Григориан күнтізбесі бойынша туған жылыңызды 12 санына бөлесіз, егер ол еш қалдықсыз бөлінсе, мешін жылы дүниеге келгенсіз. Ал егер ол бүтін бөлінбей, қалдықпен шықса, жылды сол қалдық бойынша анықтайсыз. Мысалы, 1 қалдық – тауық жылы, 2 қалдық – ит жылы, 3 қалдық – доңыз жылы, 4 қалдық – тышқан жылы, 5 қалдық – сиыр жылы, 6 қалдық – барыс жылы, 7 қалдық – қоян жылы, 8 қалдық – ұлу жылы, 9 қалдық – жылан жылы, 10 қалдық – жылқы жылы, 11 қалдық – қой жылы. Ал мүшел есебінің қай жылына жататыныңызды білу үшін туған айыңыз бен күніңізді ескеріңіз.
Айталық, 1961:12=163 және 5 қалдық шығады (1961=12х163+5). 5 қалдық сиыр жылына тура келеді. Бірақ мүшел жылы наурыздың 22-сінде басталатындықтан, сіз сиыр емес, оның алдында тұрған тышқан жылында дүниеге келген болып саналасыз.