Жұмыстан босаған кезде еңбек демалысы қоса беріле ме?

Қызметкер өз еркімен жұмыстан босату туралы арыз жазып, сонымен бірге  кезекті еңбек демалысын беруді де өтініп отыр. Жұмыстан босаған кезде еңбек демалысы берілуі тиіс пе? Мекеме басшысының қызметкерден ай соңына дейін жұмыс істеуді талап етуге құқығы бар ма?
Майдан ӘЛІАЙДАРОВ, Алматы облысы
Сарапшы маманның мәліметіне қарағанда, ҚР Ең­бек кодексінің 110-бабына сәйкес еңбек шарты тоқ­та­тыл­ған кезде жыл сайынғы ақылы еңбек демалысын пай­даланбаған немесе толық пайдаланбаған қызмет­кер­ге жыл сайынғы ақылы еңбек демалысының  пайда­ла­нылмаған күндерi үшiн өтемақы төлемi жүргiзiледi. Пай­даланбаған демалыс күндерінің саны жыл сайынғы ақы­лы еңбек демалысына құқық беретiн жұмыс ста­жы­на үйлесімді есептеледі.  Кодекстің 91-бабына сәйкес жұ­мыс беру­шi қызметкердiң нақты жұмыс iстеген жұ­мыс уақытын есепке алуды жүзеге асыруға тиiс. Осыған орай, жалақы нақты жұмыс атқарған уақыт үшін төле­не­ді.
Сонымен бірге, Кодекстің 57-бабына сәйкес, осы бап­тың 4-тармағында көзделген жағдайларды қоспа­ған­да, қызметкер жұмыс берушiге кемiнде бiр ай бұрын жаз­баша ескерте отырып, еңбек шартын өзiнiң баста­ма­сы бойынша бұзуға құқылы. Яғни, қызметкер өз ер­кі­мен жұмыстан босату жөнінде өтініш ұсынған жағ­дайд­а жұмыс беруші оған жоғарыда аталған жұмысты өтеу мерзімін белгілеуге құқылы. Бұл ретте, еңбек шар­ты қызметкер мен жұмыс берушiнiң арасындағы келiсiм бойынша аталған баптың 1-тармағында көзделген ес­керту мерзiмi аяқталғанға дейiн бұзылуы мүмкiн.