Жұмыс уақытының артық 8 сағаты үшін ақы төлене ме?

Мен жекеменшік кәсіпорында жұмыс істеймін. Жұмыс уақытының ұзақтығы 8 сағат. Еңбек кодексінде «апталық норма 40 сағат» деп анық көрсетілсе де, кәсіпорын басшылығы сенбі күні де 8 сағат жұмыс істетеді. Осы орайда менің білгім келгені, жұмыс уақыты апталық нормасының  8 сағатқа артық болуы заңда көрініс тапқан ба?
Байғали ӨТЕУҒАЛИЕВ, Ақтөбе облысы
Заңгер маманның айтуынша,  Қазақстан Республикасының Еңбек кодексіне сәйкес, бес күндiк жұмыс аптасы кезiнде күнделiктi жұмыстың (жұмыс ауысымының) ұзақтығы апталық норма 40 сағат болғанда – 8 сағат­тан, апталық норма 36 сағат болғанда – 7 сағат 12 минуттан және апталық норма 24 сағат болғанда 5 сағаттан аспауға тиiс.
Алты күндiк жұмыс аптасы кезiнде күн­делiктi жұмыстың (жұмыс ауысымының) ұзақтығы апталық норма 40 сағат болғанда – 7 сағаттан, апталық норма 36 сағат болғанда – 6 сағаттан және апталық норма 24 сағат болғанда 4 сағаттан аспауға тиiс.
Күнделiктi жұмыстың (жұмыс ауысы­мының) ұзақтығы, күнделiктi жұмыстың (жұмыс ауысымының) басталу және аяқ­талу уақыты, жұмыстағы үзiлiстер уақыты жұмыс аптасының белгiленген ұзақтығы сақтала отырып, ұйымның еңбек тәртiп­темесi ережелерiмен, еңбек шартымен, ұжымдық шартпен белгiленедi. Еңбек кодексіне сәйкес, демалыс және мереке күндері атқарылған жұмыс үшін белгіленген тәртіппен қосымша ақы төленуі тиіс.
Өнер және мәдени демалыс кәсiптiк ұйы­м­­дарының шығармашылық қызмет­керлерi, бұқаралық ақпарат құралдарының қызмет­керлерi, спортшылар, жаттықтыру­шылар үшiн Қазақстан Республикасының еңбек заңна­ма­сына, жұмыс берушiнiң актi­лерiне, ұжымдық шартқа немесе еңбек шар­тына сәйкес күн­де­лiктi жұмыстың (жұмыс ауы­сымының) өзгеше ұзақтығы белгiленуi мүмкiн.