Жүгерінің отаны қай ел?
Жүгері өсіру мәдениеті қай кезден бері бар? Оның отаны қай ел? Жүгері өсіретін ірі елдер қандай?
Абылай СЕРІКБАЕВ, Алматы қаласы
Жүгері ең алғаш 7-12 мың жыл бұрын Мексика аумағында өсіріле бастаған. Біздің дәуірімізге дейінгі кезеңнен жеткен жүгері тұқымдары елдің Оахака және Пуэбла штаттарындағы үңгірлерден табылған. Көне тұқымдардың көлемі қазіргі заманғы сұрыптардан 10 есе кіші болып шықты. Мексикалықтар ежелден жүгері өсіріп, одан азық болатын өнім ала білген. Ғалымдар ұзақ ғасырлар бойы жүгері тұқымының бірнеше рет гибридизация мен будандастыруды бастан өткергенін айтады. Бүгінде әлемде жүгері өндіру жөнінен АҚШ, Қытай, Бразилия, Мексика, Аргентина, Үндістан, Франция, Индонезия, Оңтүстік Африка және Италия елдері алғашқы ондыққа енеді. Биыл Қытайда рекорд – өндіріс көлемі тұңғыш рет 181,5 млн тоннаға жетті. 2005 жылы 131 млн тоннаға жуық өнім алынған болатын. Қазақстанға келсек, биыл бұл дәнді дақыл 104,2 мың гектардан жиналуы тиіс. Еліміз жүгеріні Ресей, Тәжікстан мен Өзбекстанға экспорттайды.
