«Жел қызы» қандай фильм?
Жақында Алматыда «Жел қызы» атты фильмнің премьерасы өткенін естіп едім. Оны кім түсірген және фильм не жайында?
Ағайша НҰРӘДІЛ, Талдықорған
Жас режиссер Жасұлан Пошанов түсірген бұл фильмдегі кейіпкер, негізінен, үшеу. Бір ауылда өскен үш жігіт ұзақ уақыттан кейін Алматыда қайта жолығады. Жасы жиырма беске келсе де сүрбойдақ жүрген жігіттердің біріне ата-анасы «тезірек үйленсін» деп, туған күніне бір бөлмелі пәтер сыйлайды. Содан ол жігіт достарынан қыз алып қашуға көмектесулерін сұрайды. Түнгі клубтардың бірінен таңдайларын жібітіп, батылдық үшін біраз сілтеп алған үш дос барда көздеріне бірінші түскен қызды Шымкентке алып қашады. Жолда талай қызықты оқиғаларға, тосын жайттарға тап болады. Қалыңдық та қауқарсыз, мінезсіз болып жолықпайды. Қажет жерінде қулыққа көшіп, жігіттерден айласын асыруға тырысады. Шағын қаржыға түсірілгеніне қарамастан, «Жел қызы» көрерменді баурайтындай шынайы көріністерге бай, тартымды картина болып шыққан.
