Жәрдемақы үшін құжаттарды кешіктіріп тапсыруға бола ма?

Әйелімнің жеке куәлігі жоғалуына байланысты жаңа туылған нәрестеміздің туу туралы куәлігін уақытында жасата алмадық. Енді бір жасқа толғанда туу туралы куәлігін алсақ дейміз. Осы куәлікті алған соң, балаға тиесілі жәрдемақыға құжат тапсырмақ едік. Жаңа туылған балаға тиесілі жәрдемақыны құжатты кешіктіріп тапсыруға бола ма?
Сапар БАЙЖҰМА, Оңтүстік Қазақстан облысы
ҚР«Балалы отбасыларға берілетін мемлекеттік жәрдемақылар туралы» Заңы­на сәйкес, мемлекеттік бюджет есе­бінен берілетін баланың туылуына орай бір реттік мемлекеттік жәрдемақы мен бір жасқа дейінгі бала күтімі үшін ай са­йын­ғы жәрдемақыны тағайындауға өті­ніш баланың туылған күнінен бастап, 12 ай ішінде қабылданады. Сіздің жағ­да­йыңызда, балаңыз бір жасқа толғанға дейін ғана жәрдемақылар тағайындауға өтініш білдіре аласыз. Жәрдемақылар та­ғайындауға қажет құжаттардың қата­рын­да баланың тууы туралы куәлігінің көшірмесі не тууы туралы акт жазбасы­ның көшірмесі  бар. Егер жаңа туған ба­ла­ңыздың туу туралы куәлігі болмаса, онда тіркеу орындарынан баланың туу туралы акт жазбасының көшірмесін ұсы­нуы­ңызға болады. Заңға сәйкес, бала­ның туылуына орай бір реттік мемлекеттік жәрдемақының көлемі:  бірінші, екінші, үшінші баланың туылуына – 30 айлық есептік көрсеткіш (АЕК); төртінші және одан көп баланың туылуына – 50 АЕК. Бір жасқа дейінгі бала күтіміне арналған ай сайынғы мемлекеттік жәрдемақының көлемі: бірінші балаға – 5,5 АЕК; екінші балаға – 6,5 АЕК;  үшінші балаға – 7,5 АЕК;  төртінші және одан көп балаға – 8,5 АЕК; 2010 жылы 1 АЕК мөлшері 1 413 теңгені; 2011 жылы 1 АЕК мөлшері 1618 теңгені құрайды.