«Жалғыз рейнджерді» көретін күн жақын

«Жалғыз рейнджер» фильмінің қазақша нұсқасы дубляждалып жатыр деп естіп едік. Оны көрудің мүмкіндігі қашан туады?
Гүлмира Айдар, Алматы қаласы
Бұл фильмнің дубляжы жақын күндері аяқталады. Қазақша дуб­ляж актерларының дауыстары  Dis­ney студиясында негізгі кезеңнен өтті.
Әйгілі Джонни Депп ойнаған бас кейіпкер Тонтоның дауысын қа­зақстандық актер Берік Айтжанов дыбыстады. Джонни Депп өз кейіп­керінің дубляжын жасайтын актерді өзі таңдаған. Ал жалғыз рейнджер­дің өзі (Арми Хаммер) Ғ.Мүсірепов атын­дағы Балалар мен жасөспірім­дер театрының актері  Бейбіт Қама­ранов­тың даусымен қазақша сөй­леді. Дубляж Cinema Tone Pro­duc­tion студиясында жасалды. Фильмнің қазақша нұсқасына Айжан Жам­шито­ва режиссерлік жасады.
«Жалғыз рейнджердің» қазақ­ша нұсқасы 2013 жылдың  4 мау­сы­мында, яғни кеше қазақ және орыс тілдерінде прокатқа шықты. Дуб­ляжды «Болашақ»  ассоциация­сы мен MARWIN  компаниясы «Са­мұрық-Қазына» АҚ қаржылық кө­мегімен жасағанын атап өткен жөн.
Тағы бір айта кететін жайт, 2011жылдан бері барлығы алты голливудтық картина дубляждалды. Олардың ішінде  «Тачки-2» («Кө­лік­тер-2»), «Люди в черном-3» («Қара киімділер-3»), «Новый че­ло­век-паук» («Жаңа Өрмекші адам»), «Храб­­рая сердцем» («Батыл жү­рек»). Сондай-ақ 2013 жылы «Уни­верситет монстров» («Монстрлар уни­верситетi») мультфильмі қазақ тілінде дубляждалды. Оның пре­мьер­асы үстіміздегі жылдың 20 маусы­мын­да өтеді.