Түйенiң етiн жеген әйел баланы 12 ай көтере ме?
Қазақта «жүктi әйел түйенiң етiн жесе, сүтiн iшсе, баланы он екi ай көтередi» деген сөз бар. Осы қаншалықты рас, ғылыми дәлелденген бе?
Бақытгүл БЕКҚЫЗЫ
Түйе ботасын он екi ай көтеретiнi рас. Осыған қарап, үлкен апа-әжелерiмiз аяғы ауыр қыздары мен келiндерiне түйенiң етiн жегiзбейтiн, шұбатын iшкiзбейтiн болған. Босанатын уақытынан сәл асып бара жатқан әйелдерге «түйенiң етiн жегенсiң бе» деп те айтылып жатады. Алайда дәрiгерлер мен ғалымдардың айтуынша, қандай жүктiлiк болса да 36-41 аптаға, яғни тоғыз ай, тоғыз күнге дейiн ғана созылады екен. Ал жүктiлiк кезiнде түйенiң етiн жеп, шұбатын iшкен келiншектердiң құрсақтағы баланы он екi ай көтеретiнi ғылыми түрде дәлелденбеген. Дегенмен түйе етi адам денесiне қуат бередi. Оның етi, жiлiк майы, өркеш майы, сүтi дәрiге пайдаланылады екен. Жүнiнiң де емдiк қасиетi бар. Түйенiң сүтi – демiкпеге бiрден-бiр ем. Оның құрамында май, белок, түрлi дәрумендер және қант бар. Бала көтере алмай жүрген әйелдерге түйенiң бақайшық майы жақсы көмектеседi екен. Ал түйенiң желiн майы – баланың iшi ауырғанда таптырмайтын ем.
