Теңізді мұнайдың төгілуінен қорғайтын экологиялық кешен салынады
Атырау облысының Дамбы ауылы маңынан мұнайдың теңізге төгілу қаупін еңсеру мақсатында экологиялық кешен құрылады делінген еді. Алайда оның құрылысы орта жолдан тоқтап қалды. Неге? Соның мән-жайын білуге бола ма?
Саламат ЫДЫРЫС, Атырау облысы
Атырауда Солтүстік Каспий экологиялық кешенін құру туралы шешім шығарылған. Төгілген мұнайды жинауға, оның көзін жоюға арналған құрал-жабдықтармен, түрлі жарақтағы кемелермен және өзге де осы салаға бағытталған соңғы техника мен технологиямен жабдықталған бұл кешен Атыраудан бірнеше шақырым жерде орналасқан Дамбы ауылында салынуы тиіс болатын. Алайда оның құрылысы кілт тоқтатылды. Өйткені бірқатар жергілікті қоғамдық ұйым бұл кешеннің қорыққа жақын орналасуына байланысты өз наразылықтарын білдірген еді. Бұл ретте мұнай және газ министрі Сауат Мыңбаевтың баспасөздегі мына мәлімдемесін келтіре кетелік:
– Экологтер мен қоғамдық ұйымдардың пікірі мен ұсынысын қабыл алдық. Соған байланысты экологиялық кешенді Орал өзенінен бір шақырым жерде орналасқан Приморский арнасында салуды шештік. Бұл кешен салынуы тиіс. Олай болмайынша, заңға сәйкес Қашаған кен орындарынан мұнай игеру басталмайды.
