Тәулікпен жұмыс істейтіндердің демалыс ақысы қалай есептелінеді?

Біз балабақшада бес күндік жұмыс кестесімен жұмыс істейміз. Осы балабақшаға қарасты тәулік бойы жұмыс жасайтын санаториялық топ бар. Осы санаториялық топ қызметкерлерінің ақылы еңбек демалысы қалай есептелінеді? Орташа жалақы мөлшері қалай анықталуы керек?
Динара СҮЛЕЙМЕНОВА, Жамбыл облысы
Қазақстан Республикасы Еңбек ко­дексінің 100-бабына сәйкес, жыл сайын­ғы ақылы еңбек демалысы қызметкердiң тынығуына, жұмыс қабiлетiн қалпына келтiруiне, денсаулығын нығайтуына және қызметкердiң өзге де жеке қажет­тiліктерiне арналады және жұмыс орны (лауазымы) мен орташа жалақысы сақтала отырып, белгiлi бiр күнтiзбелiк күндер санына берiледi.
Орташа жалақыны есептеу «Орташа жалақыны есептеудің бірыңғай ере­жесін бекіту туралы» Қазақстан Респу­бликасы Үкіметінің 2007 жылғы 29 жел­тоқсандағы № 1 394 қаулысы бо­йын­ша жүргізі­ле­ді.
Қызметкердің орташа жалақысы орташа күндік (сағаттық) жалақыны оқи­ға кезеңіне сәйкес келетін жұмыс күндерінің (жұмыс сағаттарының) санына көбейту жолымен есептеледі.
Орташа күндік (сағаттық) жалақы бар­лық жағдайларда есепті кезеңде есептелген жалақы сомасын жұмыс уақыты теңгерімін негізге ала отырып, тиісінше бес күндік неме­се алты күндік жұмыс аптасы­ның жұмыс күндері (са­ғат­тары) санына бөлу жолымен анық­талады.
Ережені қолдану бойынша әдіс­темелік ұсыныстар Еңбек және халықты әлеуметтік қорғау министрлігінің веб-сайтындағы «Өзекті тақырыптар» атты айдарында орна­ласқан.