«Тәуелсіздік толғауы» қашан болады?
«Тәуелсіздік толғауы» атты конкурстың талаптары қандай? Бұл байқау биыл да ұйымдастырыла ма, негізгі бағыттары қандай?
Саят Нұрбатырұлы, Ақмола облысы
Еліміздің Мәдениет және ақпарат министрлігі республикалық «Тәуелсіздік толғауы» конкурсын биыл да өткізеді. Конкурс келесі номинациялар бойынша өткізіледі:
1) Ең үздік ірі және кіші көлемді музыкалық шығарма, оған көпактілі опера, көпактілі балет, көпактілі музыкалық комедия, симфониялық, халық аспаптары, үрмелі және камералық оркестрлер үшін оркестрлік шығармалар, жеке әнші, хор және оркестр үшін оратория, жеке әнші, хор және оркестр үшін кантата, фортепиано мен дауысқа арналған вокалдық циклдер, романстар, сүйемелдеусіз хорға арналған шығармалар, шекті аспаптар квартетіне, үрмелі-ағаш аспаптары квинтетіне арналған шығармалар кіреді;
2) Ең үздік балалар әні;
3) Балалар мен жасөспірімдерге арналған ең үздік драмалық шығарма;
4) Кескіндеме, графика және мүсін.
Конкурсқа белгіленген номинациялар шеңберінде жеке авторлардың немесе авторлық ұжымдардың шығармалары қабылданады. Ұсынылатын шығармалар бұрын-соңды орындалмаған және жарияланбаған жаңа шығарма болуы керек.
Авторлар бір немесе бірнеше номинацияға қатыса алады. Әр номинация бойынша автор тек бір шығарма ғана ұсына алады. Конкурстың қорытындысы ағымдағы жылдың IV тоқсанында шығарылады. Ең үздік деп танылған шығармаларға ақшалай сыйлықтар тағайындалады.
Өтінім құжаттар ағымдағы жылдың 15 қазанына дейінгі мерзімде жіберілуі тиіс. Конкурсқа қатысу үшін қажетті құжаттардың қатарында Қазақстан Республикасы Әділет министрлігінің Зияткерлік меншік құқығы комитетімен берілген зияткерлік меншік объектісін мемлекеттік тіркеу туралы куәліктің болуы шарт. Байқау ережелері туралы толық ақпаратты www.mki.gov.kz ала аласыз.
