«Тәуелсіздік таңының» авторы – Тимур Сүлейменов

Жақында Алматыда бірінші рет Республика алаңындағы Желтоқсан оқиғасы құрбандарына арналған ескерткішті көрдім. Бұрын оны тек теледидардан ғана көретінмін. Осы ескерткіштің авторы кім, толық атауы қалай?
Бақтияр МАНАТҰЛЫ, Ақтөбе қаласы
Оңтүстік астананың Желтоқсан және Сәтбаев көшелерінің қиылысында орналас­қан «Тәуелсіздік таңы» монументі 2006 жылдың қыркүйек айында Елбасының қаты­суымен Желтоқсан оқиғасының 20 жылдығына орай ашылған. Жобаның авторы, белгілі қазақ сәулетшісі әрі дизай­нері Тимур Сүлейменовтің айтуынша, ескерт­кіштің композициялық құрылымы үш бөліктен тұрады. Ақ және ал қызыл гранит тастардан жасалған қос баған өткен күн мен келешектің арасындағы өзара байланысты, халықтың сана-сезімінің сіл­кіні­сі мен еліміздің тәуелсіздігін білдіреді. Ондағы оң қолына желмен желбіреген орамал, ал сол қолына көктем жаршысы саналатын символдық құс ұстаған, ұмтылыс пен самғаудағы әйел кейпі халықты әрқа­шан бірлік пен ынтымаққа шақырудың белгісі іспетті. Ескерткіштің үшінші бөлігі ою-өрнектерден тұрады. Алматы қаласы әкімдігінің мәліметіне сүйенсек, «Тәуел­сіз­дік таңы» ескерткішінің құрылысына 176 278 000 теңге жұмсалған.