Таспа құрттардан қалай сақтану керек?
Эхинококкоз ауруы қалай жұғады, ауру адамнан ба, әлде жануарлардан ба? Қалай сақтанған жөн?
Әмір Түсіпбаев, Алматы қаласы
Эхинококкоз – паразитті таспа құрттардың әсерінен ішкі органдарды зақымдайтын жұқпалы ауру. Көбіне бауыр мен өкпеге ойықтар салатындықтан, мұның соңы мүгедектік пен өлімге соқтырады. Адам таспа құрттарды үш жолмен жұқтыруы мүмкін: 1) пероралды жолмен: қайнамаған судан, жуылмаған жеміс-жидек пен көкөністен, лас қолдан жұғады; 2) жара қабықты ұстағаннан; 3) тыныс жолдары арқылы. Ауру қоздырғыштары етқоректі жануарлардың (ит, мысық, қасқыр, қорқау) тікішегінде көбейеді де, олардың нәжісімен қоршаған ортаға тарайды. Сол себепті жануарларды ұстағаннан кейін және жабайы өсімдіктерге жанасқаннан кейін қолды сабындап жуу қажет. Бау-бақшада ауызды бетпердемен бүркемелеген дұрыс. Айта кету керек, Алматыда биыл эхинококкоз ауруы өткен жылмен салыстырғанда 1,4 есе көбейген. Барлығы 20-ға жуық адамның ауру жұқтырғаны тіркелді, оның 60%-ға жуығы – жұмыссыз азаматтар. Олардың көбінің ауруды неден жұқтырғаны анықталған жоқ.
